Almatynyń belsendileri balalar men áıelderdiń quqyqtaryn qorǵaýda
2022 jylǵy 25 qarasha men 10 jeltoqsan aralyǵynda jyl saıynǵy halyqaralyq «Áıelderge qatysty zorlyq-zombylyqsyz 16 kún» aksıasy aıasynda «Zorlyq-zombylyqqa jol joq!» respýblıkalyq aksıasy ótýde.
Bul týraly ÓKQ brıfıńinde Almaty qalasy ákimi janyndaǵy áıelder isteri jáne otbasylyq-demografıalyq saıasat jónindegi komısıanyń bas ınspektory-hatshysy Gúlnar Ámirova aıtty, dep habarlaıdy Almaty-akshamy.kz.
Genderlik zorlyq-zombylyqqa qarsy naýqan 1991 jyly bastalǵan jáne ony qazaqstandyq áıelder qoldaıdy.
«Zorlyq-zombylyqsyz 16 kún» aksıasy 7 myńnan astam uıymnyń qatysýymen 190-nan astam elde júzege asyrylady. Bul naýqan 25 qarashada áıelderge qatysty zorlyq-zombylyqty joıýdyń halyqaralyq kúni bastaldy jáne 10 jeltoqsanda - Adam quqyqtary kúni aıaqtalady», - dedi G.Ámirova.
Naýqandy qolǵa alǵan kezde eki maqsat qoıyldy: genderlik zorlyq-zombylyq týraly habardar bolýdy arttyrý jáne qoǵamnyń nazaryn osy máselege aýdarý.
Gúlnar Ámirova Memleket basshysy Qasym-Jomart Toqaevtyń qyrkúıektegi Joldaýynda turmystyq zorlyq-zombylyqty elemeýge bolmaıtynyn atap ótken sózin eske aldy.
«Prezıdentimiz: «Otbasyn buzǵandar jazalanbasa, olar budan da aýyr kúızeliske túsedi. Al zardap shekkender múldem qorǵansyz. Mundaı áreketter úshin jazany kúsheıtetin kez keldi dep oılaımyn. Zardap shekkender bireýdiń sózinen nemese qysymynan qoryqpaýy kerek», - dep keltirdi spıker.
Gúlnar Ámirova otbasynda meıirimge toly qarym-qatynasty ádetke aınaldyrý kerektigin atap ótti. Balalar týylǵannan bastap otbasynda ózara túsinistikti kórip ósýleri kerek.
Almaty qalasy Qoǵamdyq keńesiniń múshesi, Almaty qalasy ákimi janyndaǵy áıelder isteri jáne otbasylyq-demografıalyq saıasat jónindegi komısıanyń múshesi, ishki ister organdarynyń ardageri Aıgúl Shópshekbaeva turmystyq zorlyq-zombylyq qurbandaryna degen kózqarasty ózgertetin kez keldi dep esepteıdi.
«Bizdiń qoǵamda zorlyq-zombylyq qalypty jaǵdaı bolyp sanalady jáne áli kúnge deıin tyńdamaǵany úshin balalardy uryp-soǵý arqyly jazalaý kerek degen pikir bar. Bıik minbelerden áıel tynysh, ári baǵynyshty bolýy kerek deıdi. Balaly áıelder qorǵansyz keledi, sondyqtan Prezıdentimiz bul máselege úlken kóńil bólip otyr», – deıdi A.Shópshekbaeva.
Spıker qalada zardap shekkenderge, onyń ishinde psıhologıalyq kómek kórsetiletin bas panalaıtyn oryndardyń bar ekenin aıtty. Turmystyq zorlyq-zombylyqtyń kýási bolǵan balalar bar. Ol turmysta zorlyq-zombylyq kórgen áıelderge olarǵa kúsh kórsetkenderdiń jaýapkershilikke tartylýy úshin der kezinde polısıaǵa habarlasýdy surady.