«Taza Qazaqstan» respýblıkalyq aksıasy aıasynda Almatyda alǵashqy eko-hab ashyldy, komúnıtı-ortalyqtarda birqatar tanymdyq jáne oqytý is-sharalary ótti, al halyqtyń áleýmettik osal toptaryna aǵashtardy kesýge kómek kórsetildi, dep habarlaıdy almaty-akshamy.kz.
Eko-hab Markov, 44 mekenjaıy boıynsha kreatıvtik keńistik negizinde jumys istedi. Ekologıalyq ortalyqta turaqty negizde qaıta shıkizattan buıymdar jasaý boıynsha oqytý dáristeri, eko-saǵattar, tımbıldıngter jáne sheberlik synyptary ótkiziletin bolady. Eko - habtyń rezıdentteri taqyrypqa sáıkes ónimder shyǵaratyn jáne iri sýpermarketterge shyǵý múmkindigi joq kásipkerler men eko-startaptar bolady.
Sonymen qatar, Almaty turǵyndary men qonaqtary paıdaly bonýstarǵa aıyrbastaý úshin eko-habqa bólek jınalǵan qaldyqtardy tapsyra alady. Kreatıvti eko-habtyń negizgi maqsaty ekologıalyq jaýapkershilik mádenıetin damytý, qaldyqtardy bólek jınaý men qaıta óńdeýdi, qorshaǵan ortaǵa uqypty qaraý qundylyqtaryn nasıhattaý bolyp tabylady.
Almatynyń komúnıtı ortalyqtarynda ekoǵa qatystysharalardyń tutas serıasy ótýde. Ekoaktıvıster jáne qorshaǵan ortaǵa jaýapkershilikpen qaraıtyn qala turǵyndary ekologıany saqtaý taqyrybyn talqylaıdy, qaldyqtardy jınaý jáne suryptaý boıynsha sheberlik synyptary men trenıńterge qatysady. Mundaı is-sharalar bilim berý baǵdarlamasynyń bir bóligine aınalady. Aldaǵy ýaqytta komúnıtı - ortalyq bazasynda shyǵarmashyl jastarǵa, eko-belsendilerge jáne eko-startaptarǵa arnalǵan aýdandyq eko-habtar ashylady.
Oqý jylynyń aıaqtalýyna baılanysty oqýshylar úshin oqylǵan kitaptarmen, gazettermen jáne jýrnaldarmen almasý boıynsha krosbýkıng aksıasy ótkiziledi.
Budan basqa, Almatyda «Merzimi ótken dári – dármekterdi tapsyryńyz-tabıǵatty saqtańyz» ekologıalyq aksıasy jalǵasýda, ony turaqty negizde ótkizý týraly sheshim qabyldandy.
Sondaı-aq, osy kúni aǵashtardy sanıtarlyq kesý aılyǵy bastalady, ol 29 mamyrdan 29 maýsymǵa deıin UOS jalǵyz turatyn ardagerleriniń, zeınetkerlerdiń, 1, 2 toptaǵy múgedektigi bar adamdardyń, kámeletke tolmaǵan balalardy tárbıelep otyrǵan jalǵyzbasty analardyń jeke úıleriniń aýlalarynda ótkiziledi.
Eske salsaq, «Almaty – bizdiń ortaq úıimiz» naýqany jáne «Taza Qazaqstan» respýblıkalyq aksıasy aıasynda megapolıste bir aıda 30 myńnan astam japyraqty aǵash jáne 5 myń buta otyrǵyzyldy, bul Nú-Iorktiń Ortalyq saıabaǵyndaǵy barlyq jasyl jelekterden de kóp.
«Almaty – baq qala» aksıasy barysynda qalanyń barlyq aýdandarynda 8 myńnan astam jasyl jelek, onyń ishinde 4 myńnan astam alma aǵashtary otyrǵyzyldy. Turǵyndarǵa óz aýlalaryn kógaldandyrý úshin 3 myń kóshet taratyldy. «Mektep aýlasynyń oazısi» festıvali aıasynda almatylyq oqýshylar 20 myńnan astam gúl, 430 jemis aǵashy jáne 200 týı kóshetterin otyrǵyzdy.
«Taza Qazaqstan» respýblıkalyq aksıasy Memleket basshysynyń tapsyrmasy boıynsha eldi mekenderdiń aýmaqtaryn abattandyrý jáne kógaldandyrýǵa,qorshaǵan ortaǵa uqypty qaraý qundylyqtaryn qalyptastyrýǵa, halyq arasynda joǵary azamattyq jaýapkershilik pen ekologıalyq mádenıetti tárbıeleýge baǵyttalǵan.