Kúdikti urlaǵan kólikterimen jol apatyna ushyraǵan.
Almatyda ótken túnde eki jeńil avtomashınasy men "jedel járdem" kóligin urlaǵan er adam ustaldy, dep habarlaıdy Almaty-akshamy.kz
Almaty polısıa departamentiniń habarlaýynsha, Qulja traktisindegi turǵyn úı kesheniniń aýmaǵynan BMW markaly avtokólikti aıdap áketý týraly alǵashqy habarlama polısıaǵa 21.45-te túsken. Aýladan shyqqan ury Audi-men soqtyǵysyp, oqıǵa ornynan qashyp ketken.
Ol urlanǵan kólikpen Almaty oblysy Eńbekshiqazaq aýdanynyń Esik qalasyna jetip, qarsy baǵytqa shyǵyp, Toyota avtokóligimen soqtyǵysqan. Alaıda ury oqıǵa ornynan izin sýytqan. Sodan keıin ol 28 jastaǵy qyzdan Nissan kóligin kúshpen tartyp alyp, tas jolda aýdarylǵan. Kýágerler "jedel járdem" shaqyrǵan kezde, er adam "jedel járdemniń" kóligin de aıdap ketken.
«Kýágerler "jedel járdem" shaqyrdy. Al ury medısınalyq brıgada kóligin de aıdap ketti. Ol oblystyq "jedel járdem" stansıasyna tıesili Jac Sunray-men qalaǵa kirgende, birden patrúldik polısıa ekıpajy ustady», - dep naqtylady Almaty polısıasy.
Medısınalyq kýálandyrý 1994 jyly týǵan kúdiktiniń esirtki qabyldaǵanyn kórsetti. Qazir ol qamaýda otyr. Polısıa urlyq faktisi boıynsha birden úsh qylmystyq is qozǵady.