Bul mamandardyń 2050 jylǵa jasaǵan boljamy.
«Eńbek resýrstaryn damytý ortalyǵy» AQ Boljamdaý departamentiniń sarapshylary týý, ólim jáne kóshi-qon kórsetkishteriniń negizinde demografıalyq boljam daıyndady, dep habarlaıdy Almaty-akshamy.kz
Taldaýǵa sáıkes, Qazaqstan halqynyń sany 2030 jylǵa qaraı 20,8 mln-nan 21,5 mln-ǵa deıin, al 2050 jylǵa qaraı 23,5 mln-nan 27,7 mln-ǵa deıin jetýi múmkin eken.
«Bul rette, eger ólim men týý kórsetkishteri 2021 jylǵy deńgeıde, al syrtqy jáne óńiraralyq kóshi-qon 2017-2021 jyldardaǵy ortasha mánde saqtalsa, Qazaqstan halqynyń sany 2030 jylǵa qaraı 20 mln 958 myń adamǵa, al 2050 jylǵa qaraı 27 mln 192 myń adamǵa jetedi», – dep atap ótti ERDO Boljamdaý departamentiniń dırektory Dmıtrıı Shýmekov.
Onyń málimetinshe, 2030 jylǵa qaraı, ortalyq senarı boıynsha, halyq sany Nur-Sultan qalasynda 420 myń adamǵa nemese 33%-ǵa, 1,7 mln adamǵa deıin, Almaty qalasynda 414 myń adamǵa nemese 20%-ǵa, 2 mln 466 myń adamǵa deıin, Shymkent qalasynda 369 myń adamǵa nemese 32%-ǵa, 1,5 mln adamǵa deıin ósedi.
Budan basqa, Túrkistan oblysynda halyq sany 207 myń adamǵa, Mańǵystaý oblysynda 170 myń adamǵa, Almaty oblysynda 145 myń adamǵa kóbeıedi. Shyǵys Qazaqstan, Qostanaı, Soltústik Qazaqstan, Qaraǵandy, Pavlodar jáne Aqmola oblystarynda halyq sanynyń qysqarýy múmkin.
2050 jylǵa qaraı, ERDO sarapshylarynyń esepterine sáıkes, boljamnyń ortalyq nusqasyn alyp qaraıtyn bolsaq, ósý boıynsha Shymkent qalasy kósh bastaıtyn bolady, onda halyq sany 1 mln 679 myń adamǵa artyp, 2,8 mln adamǵa jetedi nemese 2022 jylmen salystyrǵanda 2,5 esege artady. Nur-Sultan qalasynda ósim 1 mln 634 myń adamdy quraıdy, bul 2,3 ese ósimge, 2,9 mln adamnyń kórsetkishine sáıkes keledi. Almaty qalasynda turǵyndar sany 3,5 mln adamǵa deıin nemese 1,4 mln adamǵa (2022 jylǵa qaraı+69%) ósedi. Mańǵystaý oblysynda halyq sany 820 myń adamǵa ósedi, sonyń saldarynan óńirdegi halyq sany 1 mln 571 myń adamdy quraıdy.
«Bizdiń boljamymyz ben BUU Ekonomıkalyq jáne áleýmettik máseleler jónindegi departamentiniń jańa demografıalyq boljamy uqsas jáne senarıge baılanysty halyq sanynyń 2030 jylǵa qaraı 20,8 mln-nan 21,5 mln adamǵa deıin, al 2050 jylǵa qaraı 23,5 mln-nan 27,7 mln-ǵa deıin ósýin boljaıdy», – dep bólisti Dmıtrıı Shýmekov.