Zań men quqyqtyq tártipti, sondaı-aq quqyq buzýshylyqtarǵa múldeý tózbeýdi qamtamasyz etý máselesi İİM-niń jiti nazarynda. Jyl basynan beri ishki ister organdarymen 140 myńǵa jýyq ákimshilik quqyq buzýshylyqtyń joly kesildi, – dep habarlaıdy Polisia.kz
Sonymen qatar qoǵamdyq kóliktegi buzýshylyqtardyń jıilenýine baılanysty mınıstrlikpen el aýmaǵynda “Tasymaldaýshy” reıdtik profılaktıkalyq is-sharasy júrgizilip jatyr.
Sharanyń negizgi maqsaty – júrgizýshiler men jolaýshylardyń qaýipsizdigin qamtamasyz etý.
– Osy maqsatta polısıa kóliktik kásiporyndardyń basshylarymen keńester ótkizdi, onda avtobýstardy beınebaqylaý kameralarymen, 102 kanalyna shyǵatyn dabyl núktelerimen jabdyqtaý máseleleri kóterildi. Qazirgi ýaqytta beınebaqylaý kameralarymen 5 700-deı avtobýs jabdyqtalǵan, onyń 900-inde beıneni onlaın-qaraý múmkindigi bar, – dedi QR İİM ákimshilik polısıa komıteti basqarma bastyǵynyń orynbasary Aıdyn Orazbaev.
Profılaktıkalyq is-sharanyń birinshi kúni qoǵamdyq kólikterde jasalǵan 200-den astam quqyq buzýshylyq anyqtaldy, onyń ishinde:
– múlikti qasaqana joıý jáne búldirý;
– spırttik ishimdikterdi ishý jáne mas kúıinde júrý;
– belgilenbegen oryndarda temeki shegý; – usaq buzaqylyq;
– ortaq paıdalaný oryndaryn lastaý jáne basqalary bar.
Qoǵamdyq kólikterde qaýipsizdikti qamtamasyz etý boıynsha jumystar turaqty túrde júrgiziletin bolady.
Osyǵan baılanysty polısıa azamattardan qandaı da bir quqyq buzýshylyqtyń kýágeri bolǵan jaǵdaıda dereý 102-ge habarlaýdy suraıdy.