Qarýly kúshterdiń áskerı qyzmetshileri Qazaqstan quramasynyń sapynda oq atýdan jáne stendtik atýdan Azıanyń lısenzıalyq chempıonattaryna saıysqa túsýde, dep habarlaıdy almaty-akshamy.kz
Oq atýdan chempıonat Indonezıanyń Djakarta qalasynda (5-18 qańtar), stendtik atýdan – Kýveıttiń El-Kýveıt qalasynda (12-22 qańtar) ótip jatyr.
Indonezıada jarysqa OSK-nyń tórt sportshysy – QR Qarýly kúshteriniń qyzmetshileri Valerıı Rahymjan, Iýrıı Iýrkov, Eldar Imanqulov jáne merzimdi qyzmettiń qatardaǵy jaýyngeri Iaroslav Mahnev qatysýda. Jarys barysynda armıa sportshysy Valerıı Rahymjan fınalǵa ótip, besinshi orynǵa ıe boldy. Oq atýdan Azıa chempıonatyna Azıa qurlyǵynyń 29 elinen barlyǵy 380 sportshy qatysýda.
Kýveıtte búgin bastalatyn Azıa chempıonatynda 40 elden 500-den astam sportshy saıysta synalmaq. Qazaqstannyń namysyn 18 atqysh qorǵaıdy. Olardyń qatarynda áskerı qyzmetshiler – kishi serjant Ásem Orynbaı jáne merzimdi qyzmettiń qatardaǵy jaýyngeri Álisher Aısalbaev bar.
Bul jolǵy qazaqstandyq sportshylardyń aldyna qoıǵan mindeti – Parıjdegi Olımpıadaǵa lısenzıalyq kvota jeńip alý.