Bul týraly Májilis depýtaty Danıa Espaeva málim etti.
Atap aıtqanda, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine saqtandyrý naryǵyn jáne baǵaly qaǵazdar naryǵyn retteý men damytý máseleleri boıynsha ózgerister men tolyqtyrýlar engizý týraly» zań jobasy maquldandy, dep habarlaıdy Almaty-akshamy.kz QazAqparatqa silteme jasap.
Osy oraıda ınternet-alaıaqtyqqa baılanysty táýekelderdi tómendetý jáne qaryz alýshylardyń boryshtyq júktemesiniń deńgeıin baqylaý maqsatynda kredıttik búrolarǵa aqparatty usyný merzimderin qaryzǵa baılanysty bazalyq málimetter boıynsha 15 jumys kúninen 1 jumys kúnine deıin qysqartý kózdelgen.
«Qazirgi kezde nesıe alý salasynda alaıaqtyq jaǵdaılary kóp kezdesedi. Nege osyndaı faktiler kezdesedi? Árbir qarjylyq uıym nemese ekinshi deńgeıdegi bankter berilgen nesıeler týraly kredıttik búroǵa joldaıdy, onda berilgen nesıelerdiń bazasy 15 kúnniń ishinde qalyptasady. Bizdiń túzetýlerge sáıkes, nesıe berý aqparattary bir kúnniń ishinde tirkeledi. Endi bir-eki kúnniń ishinde 5-6 bankte bir mezgilde nesıe alýǵa tyrysqan adamdarda mundaı múmkindik bolmaıdy. Sebebi kredıttik búroda bul adamnyń bir bankte nesıe alǵany týraly málimet tirkelip turady. Sáıkesinshe, onyń qaryz júktemesi esepteledi», - D.Espaeva.
Osy oraıda depýtat nesıe alǵan adamnyń qaryz júktemesin eskere otyryp, basqa bank kredıttik búro bazasy arqyly bul málimetterdi kórip turatynyn aıtty.
«Ekinshi bank qaıtadan nesıe alýǵa kelgen adamnyń múmkindigin qarap, onyń tabysy nesıeni óteýge jetpeıtinin kórip, onyń ótinishin maquldamaıdy. Sonymen qatar, bul qadamdar ınternet-alaıaqtyqqa da tosqaýyl qoıady», - dedi Danıa Espaeva.