Memleket basshysy ál-Farabı atyndaǵy Qazaq ulttyq ýnıversıtetiniń rektory Janseıit Túımebaevty qabyldady.
Qasym-Jomart Toqaevqa oqý ornynyń bir jylda atqarǵan jumystary men aldaǵy damý jospary tanystyryldy. Sondaı-aq rektor Memleket basshysyna bilim berý úderisi, ǵylymı-zertteý jumystary jáne ýnıversıtettiń halyqaralyq jetistikteri týraly baıandady, dep habarlaıdy Almaty-akshamy.kz Aqordanyń resmı saıtyna silteme jasap.
Kezdesý barysynda Janseıit Túımebaev Prezıdentke ǵylymı jobalardyń tıimdiligi men kadrlardyń áleýetin arttyrý jáne oqý ordasynyń 90 jyldyǵy qarsańynda QazUÝ qalashyǵyn qaıta jańǵyrtý jónindegi usynysyn jetkizdi. Onyń aıtýynsha, 2024 jylǵa qaraı ýnıversıtet elimizdiń ǵylymı-tehnıkalyq damýynyń perspektıvti degen baǵyttary boıynsha 650-den astam ǵylymı jobany qolǵa almaq. Rektor ǵylymı jobalardyń nátıjelerin ekonomıkanyń naqty sektoryna aınaldyrý 20-ǵa jýyq spın-off kompanıalaryn qurý arqyly júzege asyrylatynyn aıtty.
Janseıit Túımebaev jetekshi oqý ornyndaǵy uzaq jyldardan beri qordalanǵan máselelerge de toqtalyp, olardy sheshý joldary týraly usynysyn jetkizdi. Atap aıtqanda, eskirgen jataqhanalar men tozyǵy jetken oqý korpýstarynyń jaı-kúıi, 2 myńnan astam oqytýshy men qyzmetkerdiń baspanaǵa muqtajdyǵy jóninde baıandady.
Kezdesý sońynda Prezıdent bilim sapasyn túbegeıli jaqsartý jáne elimizdiń áleýmettik-ekonomıkalyq damýyna ǵylymnyń qosatyn úlesin arttyrý máselelerine nazar aýdaryp, ýnıversıtet basshysynyń usynystaryn qoldady.