Mańǵystaý oblysyndaǵy oqýshylardyń jappaı ýlaný jaǵdaıy oqýshylardyń tamaqtanýyn uıymdastyrýdy memlekettik baqylaý tásilderin ózgertý qajettigin kórsetti, dep habarlaıdy aqshamnews.kz.
Sanıtarıalyq-epıdemıologıalyq talaptardy buzýmen baılanysty problemalardy júıeli sheshý úshin QR Densaýlyq saqtaý mınıstrligi bilim berý nysandaryn memlekettik baqylaýdyń jańa tásilderin ázirledi.
Olar balalar bolatyn nysandarǵa erekshe mártebe berýge, obektıvti baǵalaý úshin tekserýler týraly aldyn ala habarlamany alyp tastaýǵa, sondaı-aq nysandardy sanıtarıalyq-epıdemıologıalyq talaptarǵa sáıkes keltirý maqsatynda monıtorıńtik saparlardy engizýge baǵyttalǵan.
Qazirgi ýaqytta QR Kásipkerlik kodeksinde kózdelgen qoldanystaǵy normalar ýákiletti organdarǵa balalardyń barlyq bolý nysandaryn memlekettik baqylaýmen tolyq qamtýdy qamtamasyz etýge múmkindik bermeıdi.
Buǵan deıin habarlanǵandaı, Memleket basshysynyń mektep asqanalarynda balalardy toptyq ýlaný faktileri boıynsha tapsyrmasynyń sheńberinde Densaýlyq saqtaý mınıstrligi Bas prokýratýramen kelise otyryp, Mańǵystaý oblysynyń bilim berý mekemelerinde sanıtarıalyq-epıdemıologıalyq talaptardyń saqtalýyna jospardan tys tekserý júrgizýde.
Óńirde tekserý úshin barlyǵy 72 nysan aıqyndaldy, búgingi tańda 14 mektep as blogy tekserýlermen qamtyldy.
Ýlaný jaǵdaılaryn tergep-tekserý jáne mekteptegi tamaqtanýdyń qaýipsizdigin qamtamasyz etý maqsatynda oqý-aǵartý, densaýlyq saqtaý mınıstrligin, Bas prokýratýrany qosa alǵanda, múddeli organdardyń ókilderinen turatyn vedomstvoaralyq jumys toby quryldy.
Densaýlyq saqtaý mınıstrliginen vedomstvoaralyq jumys tobynyń quramyna Aqtóbe, Jambyl, Qostanaı oblystarynyń, Almaty qalasynyń sanıtarıalyq-epıdemıologıalyq baqylaý departamentterinen jáne QR DSM «Qoǵamdyq densaýlyq saqtaý ulttyq ortalyǵy» SHJQ RMK sanıtarıalyq-epıdemıologıalyq saraptama jáne monıtorıń ǵylymı-praktıkalyq ortalyǵynan 7 maman engizildi.