Túrkistan oblysynyń bilim berý salasynyń qyzmetkerleri 2 mlrd teńgeden astam soma jymqyrdy degen kúdikke ilindi.
Sybaılas jemqorlyqqa qarsy qyzmet bilim berý salasyndaǵy júıeli jemqorlyqty anyqtaý boıynsha jumysty jalǵastyrýda, dep habarlaıdy almaty-akshamy.kz Antıkorǵa silteme jasap.
Buǵan deıin Almaty, Shymkent qalalary men Qyzylorda, Aqtóbe, Almaty jáne Jetisý oblystarynda qylmystyq sqemalar ashylǵan bolatyn. Túrkistan oblysy boıynsha Sybaılas jemqorlyqqa qarsy qyzmet Shardara jáne Saryaǵash aýdandarynyń bilim bólimderiniń býhgalterlerine qatysty sotqa deıingi tergeý júrgizýde. Olar búdjet qarajatyn asa iri kólemde júıeli negizde jymqyrdy degen kúdik bar. Tergeý málimetteri boıynsha, kúdiktiler 2020-2023 jyldar aralyǵynda bilim berý salasynda jumys istemeıtin tulǵalardyń shottaryna aqsha qarajatyn aýdarý, sondaı-aq mektep qyzmetkerlerine joǵary jalaqy esepteý arqyly shamamen 2,6 mlrd teńge soma jymqyrǵan. Qazirgi ýaqytta Túrkistan oblysynyń bilim berý salasynan 17 adam qylmystyq jaýapkershilikke tartylǵan. Olardyń 4-i qamaýǵa alynypty.
Zalaldy óteý maqsatynda 39 jyljymaıtyn múlik, 44 avtomashına, zergerlik buıymdar jáne qylmystyq ister boıynsha aıyptalýshylardyń aqshalaı qarajattary buǵattaldy. Sonymen qatar, tergeý barysynda Túrkistan oblysynyń Tekserý komısıasynyń memlekettik aýdıtorynyń áreketi áshkerelendi. Ol Saryaǵash aýdanyndaǵy mektepterdiń birinde aýdıt barysynda anyqtalǵan jymqyrý faktilerin paıdakúnemdik nıetpen jasyrǵan. Sondaı-aq, Jetisý oblysynda uıymdasqan qylmystyq toptyń quramynda 2,5 jyl ishinde 4,4 mlrd teńge jymqyrǵan qalalyq bilim bóliminiń qyzmetkerlerine qatysty sotqa deıingi tergeý aıaqtaldy. Qylmystyq topqa basshy men onyń qaramaǵyndaǵylar, sondaı-aq orta mektep býhgalteri kiretin barlyǵy 13 adamnan quralǵan.
Qylmystyq-prosestik kodeksiniń 201-babyna sáıkes ózge aqparat jarıa etýge jatpaıdy. Konstıtýsıanyń 77-baby 3-tarmaǵynyń 1-tarmaqshasyna jáne Qylmystyq-prosestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.