Qazaqstanda jasandy ıntellekt mamandaryn jappaı daıarlaý bastaldy, dep habarlaıdy aqshamnews.kz
Ǵylym jáne joǵary bilim vıse-mınıstri Gúlzat Kóbenovanyń sózinshe, stýdentter óz mamandyǵy boıynga JI-di meńgeredi.
Bıylǵy oqý jylynyń taǵy bir ereksheligi – bilim baǵdarlamalaryna AI-Sana jobasynyń kiriktirilýi. Prezıdentimiz Qasym-Jomart Kemelulynyń tapsyrmasy boıynsha AI-Sana baǵdarlamasy osy jyly iske qosyldy. Bul baǵdarlama stýdentterdiń bilimdi qoǵam men bolashaq ekonomıkasy úshin qundy jobalarǵa aınaldyra alýyna jaǵdaı jasaıdy. Árbir stýdent óz mamandyǵynda jasandy ıntellektti qoldanýdy meńgerip, bolashaqta jańa tehnologıalar jasap nemese startaptar asha alady, - dedi Kóbenova.
AI-Sana baǵdarlamasy bazalyq oqytý, tereńdetilgen daıyndyq, jobalar ázirleý, akselerasıa sekildi birneshe kezeńnen turady.
Bazalyq oqytý. Aldymen 100% stýdent Coursera, Huawei jáne Astana Hub platformalarynda JI negizderin meńgeredi. Bul bilimdi barlyq bakalavrlar, magıstranttar jáne doktoranttar ıgeredi.
Tereńdetilgen daıyndyq. Keıin arnaıy ádistemelik baǵdarlama jasalyp, stýdentter kásipkerliktiń negizderin, JI-di naqty jobalarda qoldanýdy jáne jańa ıdeıalar jasaýdy úırenedi.
Jobalardy ázirleý. Kelesi kezeńde stýdentter óz jobalaryn jasap, olardy mentorlar men sarapshylardyń kómegimen damytady.
Akselerasıa. Sońǵy kezeńde úzdik ıdeıalar startapqa aınalyp, akselerasıadan ótip, halyqaralyq deńgeıge shyǵarylady.
Mınıstrlik ókiliniń dereginshe, qazirgi ýaqytta JI negizderi boıynsha kýrstan 390 myńnan astam stýdent ótti, al 3 myńnan astam oqytýshy sertıfıkat aldy.
Stýdentterimiz chat-bottardy belsendi túrde jasap jatyr. 119 jasandy ıntellekt agenti ázirlenip, testilenip jatyr, taǵy júzdegeni daıyndalý ústinde. Baǵdarlamany sátti iske asyrý úshin álemdik sarapshylar men profesorlar tartylady. Búginde jasandy ıntellekt kýrstary barlyq ýnıversıtetterde mindetti pánge aınaldy. 93 joǵary oqý orny óz baǵdarlamalaryn beıimdedi, al 20 ýnıversıtet 25 jańa bilim berý baǵdarlamasyn ashty, - dedi Gúlzat Kóbenova.
Vıse-mınıstr nátıjesinde Qazaqstanda jasandy ıntellekt mamandaryn jappaı daıarlaý bastalǵanyn atap ótti. Bul elimizdiń AQSH, Qytaı jáne Fınlándıa sıaqty JI-di keńinen engizgen aldyńǵy qatarly memleketterdiń qataryna qosylýyna jol ashady.
Bul qadamdar qazaqstandyq bilim berý júıesin nyǵaıtyp, úzdik halyqaralyq tájirıbelerdi engizýge jáne sheteldik stýdentter sanyn arttyrýǵa múmkindik beredi.