Bulbul ánshiniń úıine búleten salynatyn móldir jáshikpen barǵan ókilder merekelik kóńil-kúı syılaý úshin áýeli bir qushaq gúl usyndy.
Aty ańyzǵa aınalǵan bulbul ánshimiz Bıbigúl Tólegenova da búgin óz tańdaýyn jasady, dep habarlaıdy Almaty-akshamy.kz
«Saılaý kúni – men úshin úlken mereke. Bizdiń kezimizde saılaýǵa qýana-qýana baratynbyz. Án salyp, bı bılep, konsert beretinbiz, eldiń kóńilin kóteretinbiz. Úlkendermen birge qýanatynbyz. Shyny kerek, qazirgi keıbir jastar jalqaýlaý, istegen isine aqsha tólese eken dep turady. Al biz rıasyz kóńilmen, alǵaýsyz júregimizben patrıot boldyq. Eń alǵash daýys bergen sátim de áli esimde. Ol 1948 jyl bolatyn, 18 jasta edim. Dımash Ahmetuly Qonaevqa jáne bıolog-ǵalym Náılá Bazanovaǵa daýys bergenmin. Úıimnen bolsa da, búgin de daýys berip jatyrmyn. Daýys berý – árbir sanaly adamnyń mindeti, paryzy bolýǵa tıis. Elim kórkeıe tússe degen analyq tilegim sheksiz, aınalaıyndarym! Ár adam osylaı jasaýǵa tıis. Ózimiz osy memlekette turyp, onyń bar jaqsysyn alyp otyrǵandyqtan, nege daýys bermeske. «Memleket maǵan ne beredi» dep kútip otyrmaı, «men oǵan ne beremin» deý kerek. Bul oraıda, ásirese, jastarǵa senim artqym keledi», – dedi Bıbigúl Ahmetqyzy.