Jaýyn-shashyny, jeli men seli qatar kórinis beretin «Alasapyran» amaly júrip jatyr. Qazekeń bul amaldy asa qaýipti sanap, saqtanyp otyrǵan...
Sáýirde túrli amal bar. Mysaly, «Besqonaq» amaly ońtústikte naýryzdyń sońyna qaraı ótse, batysta sáýirdiń alǵashqy aptasynda kórinis beredi. «Otamaly» amaly, ony qazekeń «oıylǵan qys» dep ataǵan. Munan keıin «Sáýir» amaly keledi.
Al Arqada osy mezgilde oryn alatyn «Altyn kúrek» degen amal (ókpek jel, salqyn samal) bar. Sáýirdiń sońy men mamyrdyń basynda alapat nóser bolady. Bókender men kıikter tóldeıdi...
Aspan deneleriniń qozǵalysy «Alasapyran» amalynyń jaýyn-shashyndy, laısań bolatynyn ańǵartqandaı. Aldaǵy aptada ashyq, jyly kúnder de bolatynyn joqqa shyǵarmaǵan abzal. Sonymen, Qoıan jyly ketti. Elimizge ǵana emes, álemge kelgen qanshama apat, zilzala, qaýip-qaterdiń sebepkeri boldy. Ulý jyly (álde Ulyma ma) kelip jetti. Jyldyń basy jaýyn-shashyndy, ylǵaldy bolyp bastaldy. Bul molshylyqtyń nyshany.
Qalaı desek te, kóktem shyqty. Az kúnde órik gúldese, artynsha shıe, sosyn alma gúldeıdi. Tabıǵat-Ana meıirimin shashyp, sol jemisterdi el-jurtqa buıyrtsyn.
Jyrlaıdy dala qar ánin,
Shýlaıdy sýlar «kóktem» dep.
Uıqysyn buzyp jaǵanyń
Soǵady qyrdan óktem lep.
Jamyraı shýlap jas tóldeı,
«Keldi dep kóktem!» jar salyp,
Tasqynǵa tolyp tóskeı-bel,
Kóktemdi jatyr qarsy alyp.
Kóktem-qyz áne, keledi,
Jańartyp eski, kóneni.
Jer-kókti shýǵa bóledi,
Kókte kún nuryn tógedi.
Býsanyp, bosap jer tósi,
Kókteıdi endi jon-jonas.
Kóktem-qyz jerdiń erkesi,
Bastaldy tirlik qarbalas...
Óńirimizden shattyq, óńimizden kúlki ketpesin. Tabıǵat tosyn minez tanytpasyn.
Jańa jylymyz qutty-yrysty bolsyn, el jumysty bolsyn!