Berlın turǵyndary BERLIN BAZAAR-2023 kórmesinde qazaq mádenıeti men qolónerine tánti boldy
Otandyq óndirýshiler 8-12 qarasha kúnderi Germanıada ótken álemdegi eń iri Berlin Bazaar halyqaralyq kórmesine qatysty. Qazaqstannyń ulttyq pavılony Týrızm jáne sport mınıstrliginiń tapsyrysy boıynsha «Kazakh Tourism» UK AQ qoldaýymen el týrızmin óner jáne qolóner arqyly tanytý aıasynda uıymdastyryldy, dep habarlaıdy almaty-akshamy.kz.
Jyl saıynǵy Berlin Bazaar kórmesine bıyl álemniń 60 elinen tirkelgen 500-ge jýyq kreatıvti kásipkerler óz ónimderin usyndy. Uıymdastyrýshylardyń aıtýynsha, atalǵan kórme otandyq ulttyq brendter úshin jańa eksporttyq naryqtardy ashýǵa, qazaq halqynyń mádenıeti men turmysyn tanystyrýǵa jáne elimizge saıahattaǵysy keletin áleýetti týrısermen komýnıkasıa ornatýǵa tıimdi platforma boldy. Kórmede Qazaqstan pavılonyn kelýshilerge birqatar qolóner sheberi, tabıǵı ónimderdi jáne «fair trade» taýarlaryn óndirýshiler men dızaınerler tanystyrdy. Al «Kazakh Tourism» ókilderi pavılon qonaqtaryna elimizdiń eń kórikti jerleri, kýrorttyq aımaqtar men biregeı tabıǵı landshafttarymyz týraly aıtyp berdi. Ol úshin ulttyq pavılonda ornalasqan úlken ekrandarda Qazaqstan týrızmi týraly beınerolıkter kórsetildi. Málimet úshin aıta keteıik, jýyrda Qazaqstan týrızmi týraly túsirilgen vıdeorolık Eýropada eki atalym boıynsha úzdik dep tanylǵan-dy.
«Qazaqstan – ásem tabıǵatqa ǵana emes, mádenı muraǵa da baı memleket. Berlındegi kórmege elimizdiń túkpir-túkpirinen iriktelgen eń úzdik qolóner sheberleri jasaǵan ónimder qoıyldy. Bizdiń dızaınerler men sheberlerdiń ónimderi elimizdiń ulttyq mádenı kodymen jáne ózindik ereksheligimen daralanyp turdy. Mundaı is-sharalar Qazaqstannan tys jerlerde el týrızmin dáripteýge tamasha múmkindik beredi. Biz álemniń ár qıyrynan keletin qonaqtardy qarsy alýǵa jáne olardy tań qaldyrýǵa árqashan daıynbyz», - dedi týrızm jáne sport vıse-mınıstri Erjan Erkinbaev.
Qazaqstan pavılony kórme zalynyń ortasynda kıiz úı sheńberinde jasalyp, kelgen qonaqtar elimizdiń ádet-ǵurpy, salt-dástúrimen tanysty. Kórmedegi Qazaqstan stendiniń bir ereksheligi, Assol búrkenshik esimimen tanymal otandyq sýretshiniń biregeı týyndylary qoıyldy. Qylqalam ıesi erekshe týyndylaryn jasaýda kenep matanyń ornyna kilemderdi qoldanǵan. Sondaı-aq bul týyndylardyń basym bóligi Qazaqstannyń ańyz áıelderine arnalǵan. Atap aıtqanda, onyń sýretterinde Saq patshaıymy Tomırıstiń, mıftik Jer Ana jáne basqa da tarıhı tulǵalar beınelengen.
«Qazaqstan – tańǵajaıyp el. Osy kórmedegi eń úlken pavılon sizderdiki boldy. Maǵan qysqy ulttyq kıimder, moıynoraǵyshtar men ulttyq oıý-órnekteri bar betperdeler óte qatty unady. Bul – eýropalyqtar úshin tańsyq nárse. Qazaqstandyq toptama erekshe eken, ony kóptegen sán kórsetiliminde tanystyrýǵa bolady»,- dep áserimen bólisti Berlın turǵyny Gúl Shındler.
Sonymen qatar pavılonda qazaqstandyq sheberlerdiń aǵashtan, bylǵarydan jasalǵan zergerlik buıymdary, toqyma ónimderi qoıyldy. Qazaqstannyń ulttyq pavılony jármeńke qonaqtary arasynda erekshe qyzyǵýshylyq týdyrdy. Jármeńke barysynda otandyq dızaınerlerdiń ónimderi kórsetilip, kelgen qonaqtarǵa ulttyq tátti taǵamdar usynyldy.