Qazaqstandyq jazýshy Beıbit Sarybaı Sıdneı Olımpıadasynyń chempıony Bekzat Sattarhanov týraly shyǵarmasyn aıaqtaǵanyn málimdedi, dep habarlaıdy almaty-akshamy.kz.
Qalamger bul týyndysyna boksshynyń rıngten tys ómirin arqaý etken.
«Biraz ýaqyttan Bekzat Sattarhanovtyń sharshy alańnan tys ómiri týraly jazyp júrgen shyǵarmanyń núktesin qoıdym. Aıaqtaǵan bette Bekzat Seıilhanulynyń rýhyna arnap «Fatıha» men «Yqylasty» oqydym. Baıan Hasanova degen myqty redaktordyń qolyna tapsyrdym. Jaqsy jazdym dep senimdi aıtý qıyn ǵoı, jaqsy kórip jazdym... Shyǵarma týraly, jazylýy týrasynda keıinirek keńirek aıtarmyz. Buıyrsa kitap bolyp shyǵady», - dep jazdy Beıbit Sarybaı áleýmettik jelide.
Ázirge shyǵarmanyń naqty qaı ýaqytta shyǵatyny belgisiz.
Este bolsa, 20 jasynda Olımpıada chempıony atanǵan Bekzat Sattarhanov týraly buǵan deıin «Bekzat» atty kórkem fılm de túsirilgen.
Túrkistan qalasynda týǵan sportshy bokspen 5 jyl aınalysty. Osy ýaqyt aralyǵynda ol jastar arasynda el chempıonatynda top jaryp, 1998 jyly Argentınada ótken álem chempıonatynyń kúmis júldesine ıe boldy. Al eresekter arasynda 1999 jyly Tashkentte Azıa birinshiliginiń fınalyna shyǵyp, ekinshi orynǵa turaqtady. Bul synda marqum boksshy Sıdneı Olımpıadasynyń joldamasyn ıelengen bolatyn.
Ókinishke qaraı, Sıdneı Olımpıadasynda top jarǵan boksshy arada týra úsh aı ýaqyt ótkende jol apatynan qaza tapty.