Abaı atyndaǵy Qazaq ulttyq opera jáne balet teatry shańyraǵynda «Qazaq baletine 89 jyl» art-albomynyń tanystyrylymy ótti. Ádemi kómkerilgen álbomǵa elimizdiń kásibı horeografıalyq óneri aıdynynda 90 jyl boıyna qoıylǵan ulttyq spektáklderdiń búkil tarıhy qundaqtalǵan.
Bas-aıaǵy bir jylda jınaqtalǵan art-albomǵa elimizdiń barlyq teatry men bı trýppalarynyń búkil ulttyq spektáklderindegi kórinisterin beıneleıtin 65 avtorlyq sýret-ıllústrasıa engen. Iá, murajaı, teatr jáne muraǵattardan alynǵan sırek kezdesetin fotosýretter men mátinder negizinde jasalǵan túrli-tústi kitap ónersúıer qaýymdy baýrap alary sózsiz. Onyń kitap bolyp qattalyp shyǵýyna Qazaq Ballet Creative Lab-tyń jáne Nursultan Nazarbaev qory qoldaý kórsetken.
– Men byltyr Sankt-Peterbýrgtegi memlekettik ýnıversıtettiń magıstratýrasyn bitirdim. Onda ǵylymı jumysymnyń bir bóligi retinde Qazaqstannyń ulttyq baletterin zerttegen bolatynmyn. Magıstrlik dısertasıany jazý barysynda elimizdiń ulttyq horeografıalyq óneriniń damýyn tereńirek túsiný úshin túrli derekkózderge júgindim. Sonda qolǵa ilingen ádebıetterde qazaq baleti týraly ılústrasıalyq beıne, fotomaterıaldardyń jetkiliksizdigin baıqadym. Sondyqtan kóp dúnıeni elestetýge týra keldi. Osy jobany júzege asyrýdyń arqasynda qazaq baletiniń baı tarıhyn jańǵyrtýǵa múmkindik týdy. Biz qazaq mýzykalyq-horeografıalyq ónerin vızýaldy keskindeme jáne horeografıa arqyly saqtap, tanymal etýdi maqsat ettik. Álbom jumysyna otandyq óner qaıratkerleri – sýretshi Jannat Baımuhanova men dızaıner Gýzel Nurymbetova da atsalysty, – deıdi «Qazaq baletine 89 jyl» art-albomynyń jetekshisi Toǵjan Moldalim.
Rýhanı, mádenı is-sharaǵa kelgen meımandarǵa Jannat Baımuhanovanyń atalǵan art-albomǵa engen, osynaý bekzat ónerden syr shertetin sýretterinen quralǵan kórme usynyldy.