Ákimdikter turǵyn úı sektoryn, jataqhanalar men hostelderdi aralap, reıd júrgizedi, dep habarlaıdy aqshamnews.kz
Premer-mınıstr Oljas Bektenov Túrkistan oblysynyń Jetisaı aýdany Alǵabas aýylynda on eki adam ajal qushqan órtten keıin mınıstrler men ákimderge birneshe tapsyrma berdi.
«Áriptester, keshe Túrkistan oblysynyń Alǵabas aýylynda qaıǵyly jaǵdaı oryn alǵanyn bilesizder. Úkimettiń atynan qaza tapqandardyń týǵan-týystary men jaqyndaryna qaıǵyryp kóńil aıtamyn. Memleket basshysynyń tapsyrmasymen órttiń sebepterin anyqtaý úshin Úkimettik komısıa qurylyp, jumys istep jatyr. Zardap shekkenderge jáne qaza tapqandardyń otbasylaryna barlyq qajetti kómek, onyń ishinde materıaldyq jáne medısınalyq kómek kórsetiledi», - dedi Bektenov Úkimet otyrysynda.
Premer-mınıstr jylý berý maýsymy bastalǵaly beri turǵyn úı sektorynda órt oqıǵalary ósip bara jatqanyna nazar aýdardy.
«Biz bul máseleni qazan aıynda Úkimet otyrysynda qaradyq. Alaıda jaǵdaıdyń jaqsarǵanyn ázirge kórip otyrǵan joqpyz. Sondyqtan aldyn alý jáne túsindirý jumystaryn kúsheıtý qajet. Tótenshe jaǵdaılar mınıstrligine órtti boldyrmaý, adamdardyń ómirin saqtaý máseleleri boıynsha ortalyq jáne jergilikti memlekettik organdardyń jumysyn tıisti deńgeıde úılestirýdi qamtamasyz etýdi tapsyramyn. Óńir ákimdikterimen jáne İshki ister mınıstrligimen birlesip, turǵyn úı sektoryn, ásirese jataqhanalar men hostelderdi, halyqtyń áleýmettik osal toptarynyń úılerin aralap, reıdter júrgizý qajet. Mádenıet mınıstrligi men ákimdikter barlyq mass-medıa men áleýmettik jelilerde túsindirý jumystaryn jandandyrsyn. Óńir ákimdikteri gaz jabdyqtaryn qaýipsiz paıdalanýǵa baǵyttalǵan aldyn alý sharalaryn júrgizý boıynsha gaz-tehnıkalyq ınspeksıanyń jumysyn kúsheıtsin», - dep tapsyrdy Úkimet basshysy.