Premer-mınıstr Oljas Bektenov Senat depýtaty Andreı Lýkınniń saýalyna osylaı dep jaýap berdi.
Depýtattyń saýalynda beıitke arnalǵan jer telimderin zańsyz berip, satqandarǵa jaza taǵaıyndaý qajettigi kóterilgen bolatyn, dep habarlaıdy aqshamnews.kz.
Úkimet beıitke arnalǵan jer telimderin zańsyz berip satqandar úshin ákimshilik jaýapkershilik engizý máselesin qarastyryp, zańnamalyq aktilerge qajetti túzetýler engizýdi pysyqtaıdy, — dep jazylǵan Úkimet basshysynyń jaýabynda.
Sonymen qatar, Premer-mınıstr ár marqumǵa 6 sharshy metr jer memleketten tegin beriletinin málimdedi.
Jer kodeksiniń 109-babynyń 3-tarmaǵyna sáıkes, jalpy qoldanystaǵy jer qorynan qaıtys bolǵan adamǵa nemese turaqty mekenjaıy joq marqumǵa jerleý úshin 6 sharshy metrden kem bolmaıtyn jer telimi tegin beriledi, — dedi Oljas Bektenov.
Jaýapta, sondaı-aq, dinı rásimdermen baılanysty qyzmetterdiń áleýmettik mańyzy bar taýarlar men qyzmetter qataryna jatpaıtyny jáne olardyń baǵasyn memleket rettemeıtini aıtylǵan.
Bul qyzmetter naryǵynda lısenzıalaý mehanızmderi joq bolǵandyqtan, beıit aýmaǵynda kórsetiletin qyzmetterdiń baǵasyn qyzmet kórsetýshiler ózderi belgileıdi, — delingen jaýapta.
Beıitke arnalǵan bos jer telimderin anyqtaý úshin Jarıa kadastrlyq kartany qoldanýǵa bolady.
Jyljymaıtyn múlik pen jermen baılanysty mámilelerdi jasaý úshin Jyljymaıtyn múliktiń biryńǵaı memlekettik kadastrynan bos jáne ıesi bar jer telimderin onlaın kórýge bolady, — dep jazylǵan Premer-mınıstrdiń jaýabynda.