Prezıdenttikke kandıdat Saltanat Tursynbekova Almatydaǵy «Rodnık» áıelder men balalarǵa arnalǵan áleýmettik-psıhologıalyq ońaltý jáne beıimdeý ortalyǵyna bardy.
Kandıdat mundaı ortalyqtardyń mańyzdylyǵyna toqtala kele, qoǵamdyq uıymdar jumysynyń kúrdeliligin atap ótti, dep habarlaıdy «Almaty aqshamy».kz prezıdenttikke kandıdat shtabynyń baspasóz qyzmetine silteme jasaı otyryp.
Ortalyq basshysy Nına Balabaeva ortalyqtyń qandaı mańyzdy máselelerdi sheshetinin aıta kelip, olardyń qataryna zańsyz eńbek qanaýy, adam saýdasy, ajyrasqannan keıin áıelderge kómektesý sekildi máseleler bar ekenin jetkizdi.
Saltanat Tursynbekova quqyq qorǵaýshylarmen, ÚEU ókilderimen jáne qalanyń qoǵamdyq pikir kóshbasshylarymen de kezdesý ótkizdi. Kezdesýge qatysýshylar jeńildetilgen ıpoteka, áleýmettik turǵyn úı, balalardyń quqyqtaryn qorǵaý, kedeılik jáne tabys teńsizdigi máselelerin jáne basqa da kóptegen ózekti taqyryptardy kóterdi.
-SHetelde árbir reforma ony usynǵan jáne júzege asyratyn sheneýniktiń esimimen atalady. Bizde de solaı bolýy kerek. Sonda turmystyq zorlyq-zombylyq, sýısıd, esirtki qylmysyna tosqaýyl úshin – árbir jeke sheneýniktiń jeke jaýapkershiligi bolady. Nátıjelerdiń joqtyǵy úshin de jaýapkershilik bolady. Reformalardy usyný jáne mehanızmdi ázirleý jetkiliksiz, statýs-kvony ózgertýge qol jetkizý kerek. Sebebi, ár túrli baǵdarlamalarǵa árdaıym úlken qarajat bólinedi jáne olardyń qanshalyqty tıimdi ári sol maqsattarǵa jumsalǵany únemi anyq bola bermeıdi, - deıdi S.Tursynbekova.
Prezıdenttikke úmitker S.Tursynbekova buǵan deıin elordada, Qaraǵandy, Aqmola, Túrkistan oblystary men Shymkent qalasynda boldy.
Qazaqstan Prezıdentiniń kezekten tys saılaýy 20 qarashada ótedi.