Almatyda shahmattyń jyldam jáne blız túrlerinen 2022 jylǵy Álem chempıonaty ótedi.
Bul týraly Halyqaralyq shahmat federasıasynyń (FIDE) saıtynda jarıalandy, dep habarlaıdy Almaty-akshamy.kz.
«FIDE rapıd jáne blısten 2022 jylǵy álem chempıonattarynyń ótetin kúni men ornyn rastaýǵa qýanyshty.
Bedeldi shara İle Alataýy bókterinde ornalasqan Qazaqstannyń iri megapolısi – Almatyda ótedi», - delingen FIDE málimetinde.
Chempıonat 25 jeltoqsannan (sportshylardyń kelýi jáne týrnırdiń ashylý saltanaty) 30 jeltoqsanǵa deıin (sońǵy oıyn kúni jáne jabylý saltanaty) ótedi.
«Kóptegen elder (100-den astam) Qazaqstanǵa vızasyz rejımdi, sondaı-aq Vızalyq-mıgrasıa portaly arqyly beriletin birrettik elektrondy vızany alýdyń jeńildetilgen tártibin paıdalana alady», - delingen federasıa aqparatynda.