İshki ister mınıstrligi Beıbit Shúmenovtiń áli izdeýde ekenin málimdedi.
Kúdiktige qatysty sotqa deıingi tergeý merzimi QR Qylmystyq-prosestik kodekstiń 45-baby, 7-tarmaǵy, 3-tarmaqshasy negizinde toqtap tur, dep habarlaıdy almaty-akshamy.kz.
"Atalǵan fakti negizinde bıyl shilde aıynda Astana qalasy Esil aýdany polısıa basqarmasy Qylmystyq kodekstiń 293-baby, 1 bólimi boıynsha sotqa deıingi tergeý júrgizdi. Shilde aıynyń 12 kúni atalǵan adamdy kúdikti dep tanyp, onyń is-áreketin QR Qylmystyq kodeksiniń 293-baby, 2-bólim, 2-tarmaqshasy boıynsha baǵalaý jóninde arnaıy qaýly shyǵaryldy", – dep jazylǵan Kazinform agenttiginiń resmı saýalyna berilgen jaýapta.
Keıin Astana qalasy mamandandyrylǵan aýdanaralyq soty kúdiktini qamaýǵa alý sharasyn sanksıalady.
Shilde aıynyń sońynda kúdiktige halyqaralyq izdeý jarıalandy.
"28 tamyzda kúdiktige qatysty sotqa deıingi tergeý merzimi QR Qylmystyq-prosestik kodekstiń 45-baby, 7-tarmaǵy, 3-tarmaqshasy negizinde toqtatyldy", – dedi mınıstrlik.
Odan bólek, İİM baspasóz qyzmetiniń qyzmetkeri Beıbit Shúmenovti izdeý toqtatylǵan joq ekendigin, ony ustaǵanǵa deıin is júrgizý toqtap turǵanyn aıtty.
Eske salsaq, bıyl shildede qazaqstandyq boksshy Beıbit Shúmenov kópshilik orynda balasy bar er adamǵa judyryq ala júgirgen.
Sodan soń Beıbit Shúmenov dámhanadaǵy oqıǵanyń qalaı bolǵanyn aıtyp berdi. Keıin oǵan halyqaralyq izdeý jarıalandy.