Mádenıet jáne aqparat mınıstrliginiń, «Ulttyq kıno ortalyǵynyń» qoldaýymen túsirilgen «Baýyryna salý» fılmi halyqaralyq festıválderde top jaryp keledi. Jaqynda rejıser Asqat Kýchıncherekovtyń fılmi Avstrıa men Sankt-Peterbýrgte eki bedeldi marapatqa ıe boldy, dep habarlaıdy aqshamnews.kz.
Avstrıadaǵy Der Neue Heimatfilm halyqaralyq kınofestıvalinde fılm «Úzdik kórkem fılm» syılyǵyn jeńip aldy. Atalǵan festıvál júzdegen kásibı mamandardyń basyn biriktirip, mańyzdy derekti kartınalardy usynady.
23-27 tamyz aralyǵynda Sankt-Peterbýrgte ótken Lendoc Film Festival festıvalinde de «Baýyryna salý» taǵy bıikten kórinip, Ersultan Erman «Úzdik akter» nomınasıasyn enshiledi. Halyqaralyq festıváldi bes jyldan beri «Lendok» ashyq kınostýdıasy «Kınokýltýra» AUO-men birlesip ótkizip keledi.
Aıta keteıik, «Baýyryna salý» fılmi ájesiniń qolynda ósken jetkinshektiń oqıǵasyn baıandaıdy. Ájesi qaıtys bolǵannan keıin ol óziniń ata-anasyna oralýǵa jáne bóten adamdarmen jańa ortada qarym-qatynas qurýǵa májbúr bolady.
«Bul – ishinara jeke ómirimnen alynǵan oqıǵa. Men de ájemniń qolynda óstim, meni tárbıelegen sol kisi. Osy máseleni jiti zerttedim. Mundaǵy basty nárse – ata-ana men balanyń qarym-qatynasy. Ata-ájesiniń qolynda ósken kez-kelgen bala óz ata-anasyn «áke» ne «ana» dep atamaıdy. Nege olaı? Ár sondaı balanyń ishinde «meni tastap ketken» degen renish bar. Fılmniń dramatýrgıasy, eski otbasynan aıyrylǵannan keıin áli de jańa otbasy tabý múmkindigi bar ekenin kórermenge jetkizý», – deıdi rejıser.
Kýchınchırekovtyń ózi bul jobada rejıser, senarıst jáne prodúser retinde jumys istedi. Fılmniń tusaýkeseri iri halyqaralyq kınofestıvalderde ótken. Sonymen qatar jaqynda kartına prokatqa shyǵyp, kórermenniń oń baǵasyn aldy. Rejıserdiń aıtýynsha, bul týyndy – qazaq halqynyń salt-dástúrine degen erekshe qurmet.