Uly Otan soǵysyndaǵy erligi úshin 500-ge jýyq qazaqstandyq Keńes Odaǵynyń Batyry ataǵyn aldy
Ulttyq áskerı-patrıottyq ortalyǵynda Qorǵanys mınıstriniń orynbasary general-leıtenant Sultan Qamaletdınov Reseı tarıhı qoǵamynyń delegasıasymen kezdesti, dep habarlaıdy Almaty-akshamy.kz QM-niń baspasóz qyzmetine silteme jasap.
Kezdesý barysynda taraptar Uly Otan soǵysy jyldaryndaǵy halyqtyń batyrlyǵyn este saqtaý jónindegi birlesken is-sharalardy talqylady.
Memlekettik áskerı-tarıhı mýzeıge qazaqstandyq jaýyngerlerdiń Máskeý shaıqasyndaǵy qaharmandyǵy týraly biregeı muraǵattyq qujattar men materıaldar tabys etildi.
Tyl eńbekkerleriniń erlikterin máńgi este saqtaýǵa baǵyttalǵan patrıottyq jobanyń tusaýkeseri aıasynda Reseıdiń tarıhı qoǵamy Uly Otan soǵysyndaǵy jeńiske baǵa jetpes úles qosqan Qazaqstannyń eldi mekenderine «Dańqty eńbek qalasy» ataǵyn berýdi usyndy. Tizimge on bir qala kirdi: Olar – Nur-Sultan, Almaty, Shymkent, Aqtóbe, Qaraǵandy, Qostanaı, Petropavl, Semeı, Taraz, Oral, Óskemen qalalary.
"Uly Otan soǵysyndaǵy jeńistiń 77 jyldyǵy qarsańynda ata-babamyzdyń erligin eske alýǵa degen turaqty baǵytymyzdy rastaıtyn mańyzdy is-shara ótkizilýde. Reseıde qurylǵan «Dańqty eńbek qalasy» jobasy Qazaqstanda da tıisti jalǵasyn tabatyn bolady. Qazaqstan soǵys jyldarynda «maıdan arsenalyna» aınalǵany, qorǵanys ónerkásibiniń negizgi bazasyn qajetti otynmen qamtamasyz etkeni, kómir, tústi metal óndirgeni, shıkizat jáne azyq-túlik bazasyna aınalǵany, ózinde evakýasıalanǵan 220 fabrıka men zaýytty qabyldaǵany barshaǵa málim", – dedi general-leıtenant Sultan Qamaletdınov.
Qazaqstannan Qyzyl áskerge attanǵandardyń jalpy sany shamamen 1 200 000 adamdy qurady, olardyń teń jartysy soǵystan oralmady. 12-shi atqyshtar jáne 4-shi atqyshtar dıvızıasy, 7-shi atqyshtar brıgadasy jáne polkter men batalóndardyń 50-ge jýyǵy bizdiń elde quryldy.
Uly Otan soǵysyndaǵy erligi úshin 500-ge jýyq qazaqstandyq Keńes Odaǵynyń Batyry ataǵyn aldy.
Odan bólek, 700 myńnan astam adam ónerkásipke jumyldyryldy. Keńester odaǵyna kirgen barlyq elden soǵys jyldary Qazaqstan 35% mys, 83% qorǵasyn, 60% molıbden, 65% vısmýt óndirdi. Qaraǵandy oblysy 35 mln tonna kómir berdi. Osy ýaqyt ishinde tyl eńbekkerleri 5 mln tonnadan astam nan jáne 700 myń tonnadan astam et óndirdi. Uly Otan soǵysy kezinde Qyzyl áskerdiń jaýǵa atqan 10 oǵynyń 9-y qazaqstandyq qorǵasynnan quıylǵany bárimizge belgili.