Almaty qalasynyń Ekologıa jáne qorshaǵan orta basqarmasyna qarasty «Medeý» memlekettik óńirlik tabıǵı saıabaǵy Baým toǵaıynda 104 429 aǵash jáne 5081 buta bar ekenin habarlaıdy.
Olardyń barlyǵy memlekettik orman qory sanatyna jatady jáne erekshe qorǵalatyn tabıǵı aýmaqtyń bir bóligi, - dep habarlaıdy Aqshamnews.kz.
Qazaq ulttyq agrarlyq zertteý ýnıversıteti men QR ASHM Orman sharýashylyǵy ǵylymı-ınnovasıalyq ınstıtýty júrgizgen túgendeý derekterine sáıkes, saý ekpeler – 55%, álsiregen – 23%, ósimi tejelgen – 12%, qýraý bastaǵandar – 8%, qýrap bitken jáne apatty jaǵdaıdaǵysy – árqaısysy 1%. Osylaısha, apatty jaǵdaıdaǵy aǵashtardyń úlesi jalpy sanynyń 9%-dan sál ǵana asady. Bul BAQ-ta buryn taralǵan «48% aǵash kesiledi» degen aqparatty joqqa shyǵarady.
Sonymen qatar 2026 jyly aýmaqty abattandyrý aıasynda toǵaıdyń jasyl qoryn nyǵaıtý jáne tabıǵı shyǵyndardy óteý úshin myńnan astam jańa aǵash otyrǵyzý baǵdarlamasy iske asyrylady.
Aǵashtardy sanıtarlyq saýyqtyrý – bul aýrý, qýrap qalǵan jáne zaqymdanǵan butaqtardy kesý, zıankester men aýrýlarǵa qarsy kúres boıynsha keshendi is-shara. Negizgi ádisteri: sanıtarlyq maqsatta kesý, ekpelerdi óńdeý jáne aǵash dińiniń aınalasyn aldyn alý tazalaý. Bul sharalar aǵashtardyń saýlyǵyn, pishinin jáne uzaq tirshilik etýdi saqtaýǵa baǵyttalǵan.
Toǵaıdaǵy jumystar tabıǵı ortaǵa barynsha az aralasý qaǵıdatymen atqarylady. Abattandyrýda sement-beton buıymdaryn qoldanbaı, ekologıalyq materıaldar paıdalanylady. Ekologıalyq júrginshi jolaqtary men energoúnemdegish jaryqtandyrý ornatylady, sondaı-aq kelýshilerdiń qaýipsizdigin qamtamasyz etý úshin polısıa beketteri men beınebaqylaý júıeleri qarastyrylady.
Toǵaıdy qalpyna keltirý jumystary qatar júrýde. 2023 jyly eriktiler Sıvers almasy men japyraqty tuqymdardyń 1430 kóshetin, 2024 jyly emen, shyrsha jáne órik aǵashtarynyń 720 kóshetin otyrǵyzdy. Jumys eriktiler men demeýshiler esebinen, búdjet qarajatyn tartpaı júzege asyrylýda.
Osylaısha, Baým toǵaıyndaǵy barlyq is-shara tek biregeı tabıǵı aýmaqty saqtaý, saýyqtyrý jáne qalpyna keltirýge baǵyttalǵan. Maqsat – toǵaıdyń Almaty turǵyndarynyń súıikti demalys orny ári qalanyń jasyl nyshany bolyp qala berýin qamtamasyz etý.
Qala turǵyndary men BAQ ókilderin tek resmı ári tekserilgen derekkózderge - Ekologıa jáne qorshaǵan orta basqarmasynyń málimetterine, «Medeý» memlekettik óńirlik tabıǵı saıabaǵynyń aqparaty jáne jobaǵa qatysýshy ǵylymı ınstıtýttardyń derekterine súıenýlerińizdi suraımyz.