Batys Qazaqstan oblysynda sýǵa ketken eldi mekender aýmaǵynda mal ólekselerin jınaý jáne joıý jumystary júrgizilip jatyr.
BQO veterınarıa basqarmasynyń baspasóz qyzmetinen málim etkenindeı, aýdan ákimdikteri janynan qurylǵan komısıa usynǵan aqparatqa sáıkes oblysta 236 bas iri qara (Bórli aýdanynda - 33, Qaratóbede - 79, Syrymda - 68, Terektide - 56), 1 677 usaq mal (Báıterekte - 1, Bórlide - 226, Qaratóbede - 949, Syrymda - 322, Terektide - 179), 51 jylqy (Bórlide - 40, Qaratóbede - 3, Syrymda - 8), Báıterekte 7 bas shoshqa jáne 81 úı qusynyń (Qaratóbede - 74, Syrymda - 7) ólgeni rastaldy, dep habarlaıdy Almaty-akshamy.kz.
Mal ólekselerin joıý bıologıalyq qaldyqtardy joıý qaǵıdalaryna sáıkes jer transheıalarynda (shuńqyrlarda) órteý jolymen júrgizilip jatyr.
Ólekselerdi jınaý jáne joıý jumystaryna veterınarıalyq ınspeksıa, veterınarıalyq stansıa jáne respýblıkalyq epızootıaǵa qarsy otrád (REQO) qyzmetkerleri jumyldyryldy.
«Kúni búginge deıin oblys boıynsha 230 bas iri qara, 1 677 usaq mal, 51 jylqy, 7 shoshqa, 81 úı qusynyń ólekseleri joıyldy. Ólekseler jatqan aýlalar men qora-jaı oryndaryn veterınarıalyq stansıa men REQO qyzmetkerleri «Glúzamın» dezınfeksıalyq quralymen zalalsyzdandyrý jumystaryn júrgizýde», - dep habarlady vedomstvodan.
Eske sala keteıik, budan buryn sý basqan aýmaqtarda juqpaly aýrý juqtyrmaý úshin ne isteý kerektigin jazǵan bolatynbyz. Sondaı-aq Batys Qazaqstanda sý basqan jerlerde ishek aýrýlary tirkelgen joq.