Kelisilgen sanksıalar sonymen qatar Reseıdegi jáne Ýkraınadaǵy soǵysty qoldaıtyn basqa elderdegi jeke tulǵalar men uıymdarǵa da baǵyttalǵan
Batys elderi reseılik bankterdi SWIFT-ten ajyratýǵa kelisti. Mundaı sheshimdi Ulybrıtanıa, Germanıa, Italıa, Kanada, AQSH, Fransıa, sondaı-aq Eýrokomıssıa qabyldady, dep habarlaıdy Almaty-akshamy.kz QazAqparatqa silteme jasap.
TASS agenttiginiń málimetinshe, Ulybrıtanıa, Germanıa, Italıa, Kanada, AQSH, Fransıa jáne Eýrokomıssıa Reseıge qarsy jańa qatań qarjylyq sanksıalar engizýge, sonyń ishinde keıbir bankterdi aqparat berý jáne tólemderdi júzege asyrý úshin SWIFT bankaralyq júıesinen ajyratýǵa kelisti. Bul týraly senbi kúni jýrnalıserge Germanıa úkimetiniń resmı ókili Shteffen Hebestreıt málimdedi.
«Halyqaralyq qaýymdastyq sanksıa salǵan barlyq reseılik bankter, qajet bolǵan jaǵdaıda basqa reseılik bankter SWIFT júıesinen ajyratylady», - dedi ol.
Sonymen qatar, S.Hebeshtreıttiń aıtýynsha, batystyq seriktester Reseı Ortalyq bankiniń halyqaralyq qarjylyq operasıalar arqyly rúbl baǵamyn qoldaý múmkindigin odan ári shekteý týraly sheshim qabyldady.
«Kelisilgen sanksıalar sonymen qatar Reseıdegi jáne Ýkraınadaǵy soǵysty qoldaıtyn basqa elderdegi jeke tulǵalar men uıymdarǵa da baǵyttalǵan. Atap aıtqanda, bul reseılik aýqattylardyń ózderine jáne jaqyndaryna alatyn «altyn tólqujatqa» jáne Eýropa azamattyǵyn alý múmkindigin shekteıdi», - dedi S.Hebeshtreıt.
«Sonymen qatar, sanksıalardyń jyldam oryndalýyn qamtamasyz etý jáne sanksıalarǵa ushyraǵan jeke tulǵalardyń, olardyń otbasylary men fırmalarynyń aktıvterine tyıym salý úshin AQSH pen EO ókilderiniń qatysýymen jumys toby qurylady», - dedi ol.