Almaty qalasynyń áskerı-tehnıkalyq mektebinde 1941-1945 jyldardaǵy Uly Otan soǵysynyń batyry, gvardıa starshınasy Ysqaq Ýálıevti eske alýǵa arnalǵan «Eshkim de, eshteńe de umytylmaıdy» atty patrıottyq aksıa ótti.
Sharaǵa áskerı-tehnıkalyq mekteptiń kýrsanttary, batyrdyń nemereleri men shóbereleri, «Atamnyń Amanaty» qoǵamdyq birlestiginiń teń quryltaıshysy Nazym Arzymbetova qatysty.
Ysqaq Ýálıev 1902 jyly Batys Qazaqstan oblysynda dúnıege kelgen. Soǵys kezinde ol 238-shi atqyshtar dıvızıasynyń 94-shi gvardıalyq atqyshtar polkinde qyzmet etti. Ol basqarǵan mergender bólimshesi shaıqastarda birneshe ret erekshelendi. Batyr eki márte «Qyzyl Juldyz» ordenimen jáne «Erligi úshin» medalimen marapattalǵan.
1943 jyly Qazaqstannan shyqqan Qyzyl áskerdiń erligi men batyldyǵy týraly respýblıkalyq «Sosıalısik Qazaqstan» gazetinde maqala jaryq kórdi. Al 1944 jyldyń mamyr aıynda Uly Jeńiske bir jyl jetpeı, Ysqaq Ýálıev maıdanda alǵan jaraqatynan kóz jumyp, Kalının oblysyna jerlenedi. Maıdangerdiń artynda áıeli men tórt balasy qaldy.
Shara kezinde «Atamnyń Amanaty» qoǵamdyq birlestiginiń negizin qalaýshy Nazym Arzymbetova Ysqaq Ýálıevtiń nemerelerine Uly Otan soǵysy jyldaryndaǵy qazaq jaýyngeriniń erlikteri týraly maqalalary bar maıdandyq gazetterdi tabys etti.
Batyrdyń nemeresi Erjanova Madına uıymdastyrýshylarǵa óz alǵysyn bildirip, áskerı-tehnıkalyq mekteptiń kýrsanttaryna óz isiniń bilikti mamany, patrıot jáne elimizdiń senimdi qorǵaýshysy bolýdy tiledi.