Alǵys aıtý kúni búginde elimizdegi mereıli merekeniń birine aınaldy. Kóktemniń alǵashqy kúnimen birge toılanatyn merekeni Almaty qalasy boıynsha Qylmystyq-atqarý júıesi departamentiniń jeke quramy da atap ótti.
Merekege qylmystyq-atqarý salasynyń ardagerleri men qyzmetkerlerdiń ata-analary da qatysyp, júrek jardy tilekterin bildirdi, dep habarlaıdy Almaty-akshamy.kz Polisia.kz-ke silteme jasap.
Saltanatty is-sharaǵa jınalǵandardy Alǵys aıtý kúnimen quttyqtaǵan QAJD bastyǵy D.Qanatbekov merekeniń mańyzyna toqtaldy.
«Egemendi elimizdiń tarıhyndaǵy aıryqsha kúnderdiń biri bolyp esepteletin Alǵys aıtý kúni - erekshe meıram. Keńestik kezeńde qazaq jerine kúshtep qonystandyrylǵan túrli últ ókilderin jatsynbaı, tórinen oryn bergen, olardyń qıyn kezeńnen qaıyspaı ótýlerine jaǵdaı týdyrǵan qazaq halqyna degen basqa ulttardyń zor qurmetin aıǵaqtaý maqsatynda qabyldanǵan merekeniń búginde aýqymy keń. Bul kún qazir bir maqsatta ómir súretin barlyq qazaqstandyqtardyń bir-birine degen qurmetin arttyratyn kúnge aınaldy. Sizderdi osy aıryqsha kúnmen quttyqtaı otyryp, elimizdiń jarqyn bolashaǵy úshin sińirgen eńbekterińizge alǵys aıtamyn», – dedi ol.
Aıtýly merekege QAJD qyzmetkerleri Ońalbaı Jomart pen Rústem Sarsenáliniń, Dıdar Darýbaıdyń ata-analary kelip, qoshametke bólendi. Sondaı-aq Alǵys aıtý kúnine departament qyzmetkerleri Marat Jumahanov pen Baqytgúl Meırambaıdyń LA-155/1 mekemesinde eńbek etip, zeınetkerlikke shyqqan ata-analary men baqylaýshy bolyp qyzmet atqaratyn Ádilbek Qashqarovtyń da ata-analary qatysty. Merekege kelgen ata-analarǵa departament bastyǵy D.Qanatbekov tárbıeli ul-qyz ósirip, eńbekte ónegeli bolǵandary úshin alǵys hat pen gúl shoqtaryn tabystady.