Bilim men ǵylymnyń zamany.
Dúnıede eki nárseden qatelespeý kerek deıdi. Sonyń biri – mamandyq tańdaý. Desek te, almaǵaıyp zamanda qaıda, qalaı, qaıtip qadam basýdy bilmeı turǵan talapker az emes. Biraq bir sóz bar, «taǵdyrdyń jazǵany». Shynynda da solaı ma?!
Qazir XXI ǵasyrǵa ǵalymdar «arpalys ǵasyry» dep baǵa beripti. Búgin ashqan jańalyǵyńyz erteń ózekti emes. Birde fýtýrıs Mıtıo Kaký «Bolashaqta adamnyń isiniń 50%-in robottar atqarady, kóp mamandyqtar joıylmaq» dedi. Áıgili ǵalymnyń sóziniń jany bar. Bul kópten beri aıtylyp júrgen oı.
Eýropa elderinde mektep oqýshylaryna mamandyq úıretip shyǵarady eken. Qalaı? Jasóspirimdi 9 synypta beıimine qaraı baǵyttaıdy. Mashına bólshekteri, kompúterlik baǵyt, t.s.s. Tipti. «Germanıada árbir mektep bitirýshi túlek «OPEL» avtomobıliniń motoryn shashyp, qaıta jınaı biledi» degen ázil sóz bar. Ázil túbi – shyndyq. Sonymen qatar mektepten arnaýly orta tehnıkalyq mamandyq ıesi bolyp shyǵady eken. Bul – ras.
Jan-jaǵyńyzǵa kóz jiberip qarar bolsańyz, umtylys, birinen-biri asqan ǵylymı tehnologıa. Álemniń JOO-lary kil myqtyǵa esigin ashýda. IT, nanotehnologıa, robototehnologıa, mashına jasaý mamandyqtaryn ıgerseńiz, bitirgen soń qaıda baramyn dep bas qatyrmasańyz da bolady. Shet elde alpaýyt korporasıalar, holdıńter sizdi ózi izdeıdi. Sapaly maman bolsańyz, jetip jatyr. Degenmen shette bar dúnıe bizde de kezigedi.
Álemdik sarapshylardyń pikirinshe, ekonomıs, zańger, qarjygerler kereksiz. Birte-birte buny kompúter atqarýda. Oılanyp qarańyz, ataǵy myqty, biraq atqaratyn jumysy joq. Sonda ne bolmaq?
Birde ǵalamtordan «Qudaı bermegendi Sorbonna bere almaıdy» degen jazý dúnıedegi beldi oqý ornynyń mańdaıshasynda jazýly turǵany týraly oqydym. Óte sanaly oı. Bilgenge! Sizderge bir qyzyq aıtaıyn, talapker. Birde Albert Eınshteındi ýnıversıtetten shyǵarmaqshy bopty. Sebep? Baıaý oılanady eken. Kim oılaǵan.
Búginde Eınshteın formýlasy bar. Ýaqyt qysqa, tańdaý bireý. Osy tańdaý árbir jastyń ómirlik tireýi bolǵany abzal. Bolashaqty búginnen qala. Oń jambasyńa keletin mamandyqty tańda. Kim bilsin, kelesi Eınshteın siz bolarsyz. Sáttilik!