QR Bas prokýrorynyń orynbasary Erlik Kenenbaev qańtar oqıǵasyna baılanysty ustalǵandardyń quqyǵyn buzǵandardyń ústinen qansha is qozǵalǵanyn aıtty, dep habarlaıdy Almaty-akshamy.kz QazAqparatqa silteme jasap.
«Zańsyz is-áreketter, onyń ishinde azaptaýlar tergeýdiń bastapqy kezeńinde bolady. Adamdardy oqıǵa ornynan polısıaǵa aparǵan soń olar tergeýshimen nemese jedel ýákilmen ońasha qalady. Jedel qyzmetkerler ustalǵandarmen «júrekjardy áńgime» júrgizý úshin prosesýaldyq sıpattan tys qarym-qatynastarǵa jol beredi. Ustalǵandardyń kóbi óz quqyqtaryn bilmeıdi, qorǵaýshy talap etip jatpaıdy. Polısıa bul jaıtty kóp jaǵdaıda ózderine paıdalanady. Sebebi ustalǵan adamdarmen jumys júrgizýdiń naqty rettelgen tártibi joq. Qańtardaǵy oqıǵalar buǵan aıqyn dálel», - dedi Bas prokýrordyń orynbasary.
Sondaı-aq ol qańtar oqıǵasy boıynsha prokýratýra organdaryna túsken shaǵymdardyń qalaı qaralyp jatqanyn baıandady.
«12 qańtarda Almaty prokýratýrasy zańsyz qamaýda otyrǵan qalanyń 24 turǵynyn bosatty. Atalǵan fakt boıynsha arnaıy prokýror tergeý júrgizýde. Prokýrorlar ýaqytsha ustaý ızolátorlarynan negizsiz ustalǵan 96 adamdy bosatty. Sonymen birge áreketteriniń aýyr bolmaýyna baılanysty 92 adamǵa qatysty bultartpaý sharasy ózgertildi. Ustalǵan adamdarǵa qatysty quzyretti asyryp paıdalaný, ólim, azaptaý faktileri boıynsha ister tergelip jatyr. Bul sıpattaǵy 133 qylmystyq is tergelýde. Barlyq isterdiń obektıvti ótýi úshin prosesýaldyq prokýrorlar belgilendi. Ustalǵan tulǵalarǵa medısınalyq kómek qamtamasyz etildi. Qazirgi tańda qamaýda otyrǵan jáne ustalǵan 27 adamǵa qajetti medısınalyq kómek kórsetilip otyr», - dedi Erlik Kenenbaev.