Boranbaev pen Namazbaev jáne olardyń qorǵaýshylary jańa mán-jaılar boıynsha isti qaıta qozǵaý týraly ótinishhatpen júgingen joq. Bas prokýror Berik Asylov Májilis depýtattarynyń saýalyna joldaǵan jaýapta osyndaı derek keltirgen.
«Almaty qalasy Almaly aýdandyq sotynyń 14.03.2022 jylǵy zańdy kúshine engen úkimimen Boranbaev (5 jyl 2 aı bas bostandyǵynan aıyrý) ulttyq alaýyzdyqty qozdyrǵany úshin (QK-niń 174-baby 2-bóligi) jáne Namazbaevpen (5 jyl bas bostandyǵynan aıyrý) bir topta bılikti kúshtep basyp alýǵa shaqyrǵany úshin (QK-niń 179-baby 2-bóligi) sottalǵany anyqtaldy.
Osy is boıynsha sizder jańadan ashylǵan mán-jaılar boıynsha sot aktilerin qaıta qaraý týraly másele qoıyp otyrsyzdar. Sonymen birge, jańadan ashylǵan mán-jaılar boıynsha qylmystyq is jóninde is júrgizýdi qaıta bastaý tártibi men negizderi Qylmystyq-prosestik kodekstiń (budan ári – QPK) 53-taraýymen retteledi. Bul is júrgizý – qylmystyq prosestiń bir satysy jáne ol jerde úkim shyǵarý kezinde sot bilmegen mán-jaılardyń bolýy nemese bolmaýy týraly másele sheshiledi. QPK-niń 55-baby 1-bóliginiń 4-tarmaqshasyna sáıkes sot aktilerin qaıta qaraý jáne jańadan ashylǵan mán-jaılar boıynsha is qozǵaý quqyǵy tek sotqa ǵana tıesili», - dep jazylǵan jaýapta.
Bas prokýrordyń aıtýynsha, mundaı isti qaıta bastaýdyń tártibi Qylmystyq-prosestik kodekstiń 499-baby 2-bóligi boıynsha retteledi.
«Buǵan sot úkiminde belgilengen jábirlenýshi, kýá, sarapshy qorytyndysynyń jalǵandyǵy, zattaı dáleldemelerdiń, tergeý 2 jáne sot is-áreketteriniń hattamalarynyń burmalanǵandyǵy, tergeýshiniń, sýdıalardyń qylmystyq is-áreketteri, sondaı-aq sot úkim shyǵarǵan kezde ol týraly bilmegen tekserý nemese tergeýmen anyqtalǵan ózge de mán-jaılar jatady. QPK-niń 502-babyna sáıkes qylmystyq prosestiń qatysýshylary (sottalǵan, jábirlenýshi, olardyń qorǵaýshylary nemese zańdy ókilderi) ǵana jańadan ashylǵan mán-jaılar boıynsha is júrgizýdi qozǵaý týraly ótinishhatpen júginý quqyǵyna ıe. Bul rette, Boranbaev, Namazbaev jáne olardyń qorǵaýshylary osy negizdermen júginbegen, ıaǵnı olar ózderiniń is júrgizý quqyqtaryn iske asyrmaǵan. Osyǵan baılanysty sottalǵandar úkim shyǵarý kezinde sotqa belgisiz bolǵan mán-jaılardy kórsete otyryp jáne olardyń kinásizdigi nemese onsha aýyr emes qylmystyq quqyq buzýshylyqty jasaǵanyn kýálandyratyn ótinishhatty sotqa ne prokýratýra organdaryna derbes berýge quqyly ekendigin túsindiremiz», - dep jazady Berik Asylov.