Myńnan astam is tergelip, myńǵa tarta adam sottalǵan.
Bas prokýrordyń orynbasary Áset Shyndalıev qańtar oqıǵasy boıynsha Prezıdent jarıalaǵan bir rettik raqymshylyqqa kimder ilikpeıtinin aıtty, dep habarlaıdy Almaty-akshamy.kz.
«Ázirge naqty sanyn aıta almaımyn. Óıtkeni qazir pysyqtap jatyrmyz. Prezıdent tapsyrma berdi, endi qarastyrý kerek. Ekstremıstik qylmys jasaǵandar, qańtar oqıǵasyn uıymdastyrǵandar raqymshylyqqa ilikpeıdi», - dedi Shyndalıev Májilis kýlýarynda.
Aıtýynsha, myńnan astam is tergelip, myńǵa tarta adam sottalǵan.
«Osy statısıkany nazarǵa alý kerek. Ázirge qansha adamǵa amnıstıa jarıalanatynyn aıtýǵa daıyn emespin. Ekstremısterdiń jalpy sany esimde joq, óıtkeni is óte kóp», - dedi bas prokýrordyń orynbasary.
Ol raqymshylyqqa iligetin adamdardyń sany keıin habarlanatynyn jetkizdi.
«Biz tergeý kezinde de izgilik tanyttyq. Esterińizde bolsa, Prezıdent qańtar oqıǵasynan keıin jeńil qylmysqa barǵandardy bas bostandyǵynan aıyrmaýdy tapsyrǵan edi. Qatelespesem, 983 adam sottaldy, onyń ishinde 100-den astamy naqty jazaǵa kesilse, qalǵandary shartty túrde jáne bas bostandyǵy shekteldi», - dedi Shyndalıev.
Ol jappaı tártipsizdikter kezinde qaza tapqandar sany ózgermegenin atap ótti.