Ortalyq qalalyq klınıkalyq aýrýhana dárigerleri tuńǵysh ret sal aýrýyna biregeı ota jasady.
Selektıvti rızotomıa dep atalatyn ota 18 jastaǵy jigitke mindetti áleýmettik medısınalyq saqtandyrý esebinen jasaldy, dep habarlaıdy Almaty-akshamy.kz Baq.kz-ke silteme jasap.
OQKA baspasóz qyzmetiniń málimetinshe, operasıany Ortalyq klınıkalyq aýrýhana neırohırýrgi Marat Almatov, №2 qalalyq balalar aýrýhanasy neırohırýrgi Azamat Jaıylǵanov pen nevrolog-neırofızıolog Gúlnur Qasenova bastaǵan bilikti mamandar jasady.
Dárigerlerdiń aıtýynsha, mundaı ota balalyq shaqta jasalýy qajet. Bul sal aýrýymen aýyratyn pasıenttiń qımyl-qozǵalysyn jeńildetip, júrisin qalypqa keltirer edi. Alaıda pasıent mamandar kómegine 18 jasqa tolǵannan keıin ǵana júgingen.
Selektıvti dorsaldy rızotomıa – serebraldy sal aýrýymen týylǵan naýqastardyń qurysqan bulshyq etin jumsartyp, qımyl-qozǵalysty retteýge arnalǵan operasıa. Ota barysynda dáriger julynnyń tómengi bóligindegi sensorlyq qabyqshalardy ishinara alyp tastaıdy. Bul aıaq-qoldyń qurysýyn azaıtyp, naýqastyń jaǵdaıyn edáýir jaqsartýǵa múmkindik beredi.
«Neırohırýrgten zergerge tán sheberlikti qajet etetin kúrdeli operasıa 6 saǵatqa sozyldy. Ota barysynda biz mıkroskop arqyly neıromonıtorıng jasap otyrdyq Nátıjesinde belgili bir bulshyq etterdiń jumysyna jaýap beretin júıke júıelerinde aqaý bary anyqtaldy. Bylaısha aıtqanda, bulshyq etterdi qursap, pasıenttiń júrip-turýyn qıyndatqan júıke talshyqtary alynyp tastaldy», – deıdi OQKA neırohırýrgıa bóliminiń meńgerýshisi Marat Almatov.
Osy jasqa deıin qımyl-qozǵalys shektelýinen zardap shegip kelgen jas jigit qazir óz betinshe júrip-turady. Búginde aýrýhanadan shyǵýǵa daıyndalyp jatyr. Keıin pasıent reabılıtasıadan ótýi tıis. Operasıa sátti ótkenimen onyń nátıjesin kúsheıtý úshin uzaq ýaqyt medısınalyq ońaltýdan ótý qajet.
Eske sala ketsek, medısınalyq saqtandyrý engizilgennen keıin Almaty qalasy densaýlyq saqtaý salasynyń búdjeti edáýir artty. 2022 jyly salaǵa 243,5 mlrd teńge qarastyrylǵan, bul byltyrǵy búdjetten 17,3 prosent artyq. Onyń 136,4 mlrd teńgesi – tegin medısınalyq kómek paketine, 107,1 mlrd teńgesi – MÁMS paketine tıesili. Máselen, ótken jarty jylda joǵary tehnologıalardyń kómegimen jasalatyn operasıalardy qarjylandyrý deńgeıi 5,4 mlrd teńgege artty. Iaǵnı, 2021 jyldyń birinshi jartysynda atalǵan operasıalarǵa 16,2 mlrd teńge jumsalǵan bolsa, bıyl 21,6 mlrd teńge bólingen.