Balalardyń qaýipsizdigi úshin áleýmettik jelilerge qatysty zańnamalyq sharalardy kúsheıtý usynyldy.
Usynys avtory – Májilis depýtaty Juldyz Súleımenova Qazaqstandaǵy balalar sýısıdine qatysty zańnamalyq sharalar qabyldaýdy usyndy, dep habarlaıdy aqshamnews.kz
Depýtaty óz ustanymyn Facebook jelisinde bólisti.
"Sońǵy kúnderi balalarymyzdyń óz-ózine qol jumsaý faktileri qoǵamnyń qatty alańdaýshylyǵyn týdyrýda. Bul jantúrshigerlik qaıǵyly jaǵdaılar eshkimdi beı-jaı qaldyrmaǵany anyq. Aıdyń-kúnniń amanynda jelkildep ósip kele jatqan órenderimizden aıyryldyq. Ómirden qyrshyn ketken marqumdardyń týystary men jaqyndaryna kóńil aıtamyn. Iá, resmı tergeý bastaldy. Biraq qazirdiń ózinde munyń bári naqty oryndaýshysy bar qylmys, kisi óltirý dep aıtýǵa bolady. Aıýandyqpen qylmys jasaǵandardy, ıaǵnı arandatýshylardy anyqtap, zańdy túrde jazaǵa tartýdy quqyq qorǵaý organdary qajet bolsa halyqaralyq izdeý jarıalap, oryndaıdy dep úmittenemin", dedi Juldyz Súleımenova.
Depýtattyń aıtýynsha, áleýmettik jeliler men messendjerler bul qylmystardy júzege asyrýǵa jaǵdaı jasap, áli tolysa qoımaǵan jasóspirimderdiń psıhıkasyna keri áser etetin quralǵa aınalǵan.
«Al endi osy qylmystardy iske asyrýǵa jaǵdaı týǵyzyp otyrǵan áleýmettik jeliler men messendjerler ekenin ashyq aqparat kózderinen oqýdamyz. Ony jaltaqtamaı aıtý qajet dep sanaımyn. Olar sanasy áli qatpaǵan jetkinshekterimizdiń psıhıkasyna teris áser etetin quralǵa aınaldy. Eń soraqysy sol, bul oıyndar men kvestter psıhologıalyq turǵydan aıtqanǵa kóndirý daǵdylaryn qoldana otyryp, kásibı túrde jasalýda. Biraq, eń bastysy, muny men ustaz retinde, ana retinde, depýtat retinde aıtamyn – memleket pen qoǵam áleýmettik jeliler men messendjerlerdiń ákimshilerinen taralyp jatqan aqparatqa baqylaýdy kúsheıtýin talap etýi kerek dep sanaımyn. Taralyp jatqan zańsyz, zıandy, búldirshinderdiń sanasyn ýlaıtyn júktemelerge baqylaýdy oqys kúsheıtýdi qatań talap etý kerek. Jaýapty mınıstrlik mektepterdegi psıhologıalyq qyzmetterdiń jumys algorıtmderin ózgertýi tıis. Olar balalardyń minez-qulqyndaǵy jáne júris-turysyndaǵy belgilerdi ýaqtyly anyqtaýda tıimdi qural bolýy kerek. Eger mundaı talap oryndalmaıtyn bolsa, onda memleket baqylaýdy kúsheıtsin. Barlyq qaýipti kontentke qatań tosqaýyl qoıylsyn. Al jekelegen kontentke tosqaýyl qoıýǵa qol jetkizý múmkin bolmaıtyn bolsa, onda naqty zań buzǵan áleýmettik jeli nemese messendjer buǵattalýy kerek,- dep basa aıtty depýtat.