Pedıatrıa ortalyǵynda Balalar kúni atap ótildi.
Pedıatrıa jáne balalar hırýrgıasy ǵylymı ortalyǵynda Halyqaralyq balalardy qorǵaý kúnine oraı, qaterli dertke jáne sırek kezdesetin aýrýlarǵa shaldyqqan balalar úshin «Bar meıirimimiz balalarǵa!» atty merekelik shara ótti, dep habarlaıdy Almaty-akshamy.kz.
Aıtýly merekege arnalǵan sharany Pedıatrıa ortalyǵynyń Basqarma tóraǵasynyń ǵylymı jáne ınovasıalyq qyzmetter jónindegi orynbasary Lázat Manjýova ashyp, barsha qaýymdy kele jatqan Balalar kúnimen quttyqtady. Jazdyń alǵashqy kúnimen tuspa-tus keletin Balalar merekesimen sonymen qatar, PBHǴO respýblıkalyq Balalar onkologıasy jáne gematologıa ortalyǵynyń jetekshisi Gúlnar Ábdilova, «Halyq» qaıyrymdylyq qorynyń dırektory Baǵynbek Shýnkeev, Maqan Esbolatov atyndaǵy İshki ister mınıstrligi Akademıasynyń ókili Indıra Shamshıeva quttyqtap, aqjarma tilekterin bildirdi.
Merekelik shara «Mármár» óner ortalyǵy oqýshylarynyń oryndaýyndaǵy kúmbirlegen kúımen ashyldy. Merekege Uly Abaı óńiriniń belgili ánshileri Dastan Qalıqanuly, Bolatbek Ysqaq, Shynbolat Uzaqbaı, Erkebek pen Álıa Áýkenovalar arnaıy qatysyp, án shashýlarymen balalarǵa merekelik kóńil-kúı men qýanysh syılady. Pedıatrıa ortalyǵynda em alyp jatqan balalardy qoldaýǵa «Melisa Brand» stýdıasynyń ánshisi Ázıza Nurbaqytqyzy, «Kınder» horeografıalyq ansambli men «Baglan Abdraim» óner ortalyǵynyń jas ónerpazdary da kelip, óz ónerlerin pash etti. Kópshilikti Maqan Esbolatov atyndaǵy İshki ister mınıstrligi Akademıasy kýrsanttarynyń óneri tánti enti. Olardyń oryndaýynda patrıottyq ánder shyrqalyp, arnaıy fleshmob kórsetildi.
Balalar úshin túrli móltek fılm keıipkerlerimen fotosessıalar uıymdastyryldy. Qazaqstandyq qor bırjanyń demeýshiligimen kelgen anımatorlar búldirshinderdiń kóńilin kóterip, túrli oıyndar oınady.
Merekelik shara sońynda demeýshiler tarapynan barsha balaǵa syılyqtar taratyldy.
Shara barysynda Pedıatrıa ortalyǵynyń №2 onkogematologıa bóliminde em alyp jatqan balalardyń ata-analary sóz sóılep, barsha demeýshilerge alǵystaryn bildirdi.
Pedıatrıa ortalyǵynda em alyp jatqan barlyq balaǵa zor densaýlyq, mol baqyt, baqytty balalyq shaq, qýanysh pen shattyqqa toly jarqyn ómir tileımiz! Balalar merekesi qutty bolsyn!
Aýyr dertke shaldyqqan balalarǵa mereke, qýanysh syılap, aty jaman aýrýdy jeńýge degen senim uıalatýǵa umtylǵan sharanyń psıhologıalyq kómegi zor dep bilemiz.
Bul tarapta merekelik sharaǵa atsalysqan barsha demeýshilerge alǵysymyzdy bildiremiz! Bıyl balalar úshin mereke Qazaqstan qor bırjasy, «Amıla», «Halyq» qaıyrymdylyq qorlary, QR İshki ister mınıstrligi Akademıasy, «Sosa Sola» jáne t.b. kompanıalardyń demeýshiliginiń arqasynda ótti.