1 maýsym - Halyqaralyq Balalardy qorǵaý kúnine oraı 29 mamyr kúni Pedıatrıa jáne balalar hırýrgıasy ǵylymı ortalyǵynyń bir top dárigerleri men S.J.Asfendıarov atyndaǵy Qazaq ulttyq medısına ýnıversıtetiniń balalar aýrýlary kafedrasynyń mamandary İle aýdanyndaǵy balalardy tegin qarady.
«Pedıatrıalyq desant» qaıyrymdylyq sharasy Almaty oblysy, İle aýdanynyń «Almaty Contact logistic» bazasynda ótti, dep habarlaıdy Almaty-akshamy.kz.
Pedıatrıa ortalyǵy mamandary atalmysh holdıń qyzmetkerleriniń balalaryn qarap, keńesterin berdi. Dárigerler bir jastan -17 jasqa deıingi barlyǵy 100-den astam balany qarap, densaýlyqtaryn tekserdi. Qyzmetkerler balalaryn nevrolog, pedıatr, oftalmolog, hırýrg, gastroenterolog, gematolog jáne t.b.mamandarǵa kórsetip, júrektiń, ish qýysy músheleriniń jáne búırektiń últradybystyq zertteýinen tegin ótýge múmkindik aldy.
Medısınalyq tekserý kezinde balalar densaýlyǵynan anyqtalǵan negizgi kinárattar - anemıa, kórý ótkirliginiń nasharlaýy, ish qatý, tis karıesi, skalıoz, alergıalyq aýrýlar, gadjetterdiń áserinen júıke júıesiniń buzylýy, sondaı-aq júrek-tamyr júıesiniń patologıalary. Qosymsha tekserilý men qaralýdy qajet etetin balalar Pedıatrıa jáne balalar hırýrgıasy ǵylymı ortalyǵyna emdelýge jiberildi.
«Pedıatrıa ortalyǵy jyl saıyn Halyqaralyq Balalardy qorǵaý kúnine oraı dástúrli túrde túrli aksıalar ótkizedi. Bıyl biz «Almaty Contact logistic» holdıńiniń ótinishimen, sol mekemede qyzmet jasaıtyn mamandardyń balalaryn qaraýdy sheshtik. Bul kompanıa ult saýlyǵyna asa zor mán beredi. Atalmysh kompanıa bizdiń ortalyqqa balalardy qaraýǵa, dıagnostıka jasaýǵa qajetti, óte qymbat turatyn medısınalyq qural-jabdyqtardy alyp berýge, bizdiń ortalyqtyń zerthanasyn jóndeýge úlken kómegen tıgizgendigin atap ótkim keledi. Búgin holdıń qyzmetkerleri barlyq qabyldaýlar men ýzılerden tegin ótkenderi úshin dán rızashylyqtaryn bildirýde. Biz de kómegimizdi tıgizgendigimizge tántimiz», dedi Aqyly dıagnostıkalyq keńes berý bóliminiń meńgerýshisi, gastroenterolog-dıetolog dáriger Alfıa Nazarova.