Medeý aýdanyndaǵy №115 bóbekjaı-balabaqshasynda «AMANAT» partıasynyń «Baqytty otbasy» jobasy aıasynda «Tolaǵaı» atty otbasylyq sporttyq jarys ótti.
İs-sharanyń basty maqsaty – otbasy qundylyqtaryn dáripteý jáne salaýatty ómir saltyn mektepke deıingi jastaǵy balalardyń boıyna sińirý. Jarysqa №110, №114, №115 jáne №125 bóbekjaı-balabaqshalarynyń tárbıelenýshileri men olardyń ata-analary belsene qatysty. Shara barysynda qatysýshylar túrli sporttyq estafetalar men oıyndar arqyly uıymshyldyqty, belsendilikti jáne otbasy músheleri arasyndaǵy ózara birlikti kórsetti.
İs-sharaǵa Almaty qalalyq fılıaly tóraǵasynyń orynbasary Qýanysh Tólepov, qalalyq máslıhat depýtaty Elena Te, Olımpıada chempıony, partıa múshesi Ermahan Ibraımov jáne basqa da qoǵam belsendileri arnaıy qatysty.
№115 bóbekjaı-balabaqshasynyń meńgerýshisi Alfıa Estenova óz sózinde sheteldik taǵylymdamalardan kórgen ozyq tájirıbeni balabaqsha tárbıe úrdisine engizýdiń mańyzyn atap ótti:
– Bul shara – sheteldik taǵylymdamalar barysynda jınaqtalǵan ozyq tájirıbeni mektepke deıingi tárbıe men oqytý prosesine engizýdiń alǵashqy qadamdarynyń biri. Malaızıa, Qytaı, Polsha jáne Germanıa memleketterinde kórgen tıimdi tásilder – balalardyń kúndelikti ómirin belsendi ári sanaly etýdiń joly. Ásirese, ulttyq sport túrleri, ózin-ózi kútý daǵdylary, ashyq alańdaǵy oıyndar, ózin-ózi kútý daǵdylary men psıhologıalyq qoldaý baǵyttary bizdiń júıege de oń yqpal etetinine senimdimin. Mektepke deıingi jas, ol – densaýlyqtyń, jeke tulǵa bolyp qalyptasýdyń negizi qalanatyn mańyzdy kezeń, – dedi.
Jarys nátıjesi boıynsha oryndar kelesideı bólindi: 1 oryn – №110 bóbekjaı-balabaqshasy; 2 oryn – №114 bóbekjaı-balabaqshasy; 3 oryn – №115 bóbekjaı-balabaqshasy; 4 oryn – №125 bóbekjaı-balabaqshasy.
Otbasy – qoǵamnyń ózegi. Mundaı is-sharalar jas urpaqqa durys baǵyt-baǵdar berip qana qoımaı, olardy fızıkalyq jáne rýhanı turǵyda shyńdaýǵa yqpal etedi. Bul el bolashaǵyna salynǵan berik irgetas.