Almaty qalalyq Jedel shuǵyl kómek kórsetý aýrýhanasyna jýyrda jasy júzge tolǵan Marıa apa tústi. Úıinde abaısyzda qulap qalǵan keıýanaǵa jedel járdem qyzmeti dereý kómek kórsetip, aýrýhanaǵa jetkizdi. Tekserý nátıjesinde sol jaq jambas súıeginiń synýy, naqtyraq aıtqanda, súıek bólikteriniń yǵysýymen asqynǵan kúrdeli jaraqat anyqtaldy.
Mundaı dıagnoz kez kelgen adam úshin aýyr soqqy ekeni anyq. Al ǵasyr jasaǵan ájeı úshin bul – ómir men ólim arasyndaǵy úlken synaq.
Dárigerler naýqas aýrýhanaǵa jetkizilgen kúni-aq oǵan shuǵyl túrde jabyq repozısıa jáne osteosıntez ádisi arqyly «Gamma» tıpti ıntramedýllárlyq shtıftpen jambas súıegin bekitý otasyn jasady. Bar bolǵany 30 mınýtqa sozylǵan bul kúrdeli ota sátti aıaqtaldy.
Travmatologıa jáne ortopedıa bólimshesiniń meńgerýshisi Medet Janysovtyń jetekshiligimen jasalǵan otaǵa asıstent Islambek Nurmahashev, anestezıolog Álibek Satybaldıev jáne otalyq medbıke Ásel Abylǵazınova qatysty. Kásibı sheberlik pen komandalyq úılesimdi jumystyń arqasynda Marıa apa birneshe kúnniń ishinde júrýge arnalǵan kómekshi quralyna súıene otyryp qozǵala bastady. Jetinshi kúni onyń jaǵdaıy qanaǵattanarlyq dep baǵalanyp, ambýlatorıalyq em alý úshin úıine shyǵaryldy.
– Júz jas – úlken beles. Al osyndaı jasqa kelgen adamnyń qaıta júrip ketkenin kórý – biz úshin zor mártebe. Bul – ýaqtyly kórsetilgen medısınalyq kómektiń, zamanaýı tásil jáne eń bastysy, naýqastyń ómirge degen qulshynysynyń jemisi, – deıdi bólimshe meńgerýshisi Medet Janysov.