Almaty ákimi Baqytjan Saǵyntaev tamyz keńesinde megapolıs mektepterinde oflaın rejımde bilim berý qalaı uıymdastyrylatynyn aıtty, dep habarlaıdy almaty-akshamy.kz
«Almaty mektepteri postkovıdtik kezeńde: Bilim sapasy, balalardyń densaýlyǵy jáne otbasynyń róli» atty onlaın-forým barysynda megapolıs ákimi Baqytjan Saǵyntaev jańa oqý jylynda qalanyń 287 mektebi 300 myńǵa jýyq oqýshyǵa esigin aıqara ashatynyn aıtty. Birinshi synyptarǵa 30 myńnan astam bala barady.
Jańa oqý jyly qarsańyndaǵy mańyzdy mindetter – balalardy oqytý men tárbıeleý úshin qaýipsiz jáne jaıly jaǵdaılar jasaý, balalar men qyzmetkerlerdiń densaýlyǵyn qorǵaýdy qamtamasyz etý, oqytý-tárbıeleý prosesin sapaly uıymdastyrý, onyń ishinde balalardyń bilimderin jetildirý jáne psıhologıalyq qoldaý kórsetý.
Osyǵan oraı, Almaty qalasynyń ákimi Baqytjan Saǵyntaev bilim basqarmasyna sanıtarlyq-epıdemıologıalyq baqylaý departamentimen jáne qoǵamdyq densaýlyq basqarmasymen birge mektepterde 1 qyrkúıekten bastap sanıtarlyq-epıdemıologıalyq qaýipsizdikti qamtamasyz etý úshin turaqty monıtorıń júrgizýdi tapsyrdy. Sonymen qatar kúndelikti profılaktıkalyq is-sharalardyń júrgizilýine jáne mektepterdiń qajetti dezınfeksıalyq jáne basqa qorǵanys quraldarymen jabdyqtalýyna baqylaý ornatylady.
Budan ózge, mektepterde naýqas balalar anyqtalǵan jaǵdaıda, olardy keıin qashyqtan oqytýǵa aýystyrý úshin algorıtm áreketteri ázirlendi. Bilim basqarmasyna ata-analar qaýymdastyǵymen sapaly keri baılanys ornatý, onyń ishinde ata-analarǵa keńes berý úshin barlyq bilim berý uıymdarynda «senim telefondary» men call-ortalyqtardyń jumystaryn jandandyrý tapsyryldy.
«Oqytýdyń dástúrli formatyna oralýdyń mańyzdy sharttarynyń biri bilim berý salasy qyzmetkerlerin vaksınalaý bolyp tabylady. Búginde medısınalyq qarsy kórsetkishteri barlardy qospaǵanda, memlekettik bilim berý uıymdarynda jumys isteıtin 33 myńnan astam qyzmetker 100% vaksınalandy», - dedi Baqytjan Saǵyntaev.
1 qyrkúıekke deıin jeke bilim berý uıymdarynyń qyzmetkerlerin vaksınalaý aıaqtalady, qazirdiń ózinde 10 myńnan astam adam nemese 95%-y ekpe saldyrdy.
Jańa oqý jyly qarsańynda mektepterde jáne oǵan jaqyn aýmaqtarda qaýipsizdikti qamtamasyz etý boıynsha profılaktıkalyq sharalar kúsheıtildi. Búginde barlyq bilim berý uıymdary ishki jáne syrtqy beınebaqylaý júıelerimen qamtamasyz etilgen, 239 uıymda (33 balabaqsha, 187 mektep, 15 ınternat, 4 kolej), bul júıeler polısıa departamentiniń jedel basqarý ortalyǵyna qosylǵan.