Ákim qalanyń ekologıalyq jaǵdaıy ákimdik jumysyndaǵy basty baǵyttardyń biri ekenin atap ótti.
Bul týraly megapolıs ákimi «Almaty» telearnasyndaǵy Akimat LIVE baǵdarlamasynyń tikeleı efırinde aıtty, dep habarlaıdy Almaty-akshamy.kz.
Ákimniń aıtýynsha, ótken jyly qala kásiporyndarynyń shektelgen jumys rejımi esebinen zalaldy zattar azaıǵan. Jalpy, zalaldy zattar kólemi 122 myń tonnany qurady, bul 2019 jylmen salystyrǵanda 3 myń tonnaǵa az.
Avtokólikterden shyǵatyn zalaldy zattar 10 myń tonnaǵa azaıdy, al, kerisinshe, stasıonarlyq kózderden shyǵatyndar 7 myń tonnaǵa ósti.
Qaladaǵy jeke turǵyn úılerdi gazǵa kóshirý jalǵasýda. Almatynyń úıleriniń 99%-y qazirdiń ózinde gazǵa qosylǵan. Ákimdik muqtaj otbasylardy qoldaý baǵdarlamasyn iske asyrýda. 2020 jyly 92 úı gazǵa tegin qosyldy.
Dızelmen jáne benzınmen júretin qoǵamdyq kólikti satyp alýǵa tyıym salý oń yqpalyn tıgizdi. Qoldanystaǵy barlyq kelisimsharttar tek gazben júretin avtobýstardy jetkizýge baǵyttalǵan.
Qoǵamdyq kólik júıesinde 2441 avtobýs jumys isteıdi, onyń ishinde 1715 avtobýs (75%) dızeldi otynmen júredi. 2020 jyly gazben júretin 150 avtobýs satyp alyndy. 2021 jyly gaz ben elektr energıasyn paıdalanatyn 500-ge jýyq qoǵamdyq kólik quraldaryn satyp alý josparlanýda.
Budan ózge, ákim Baqytjan Saǵyntaevtyń aıtýynsha, Almatyda qalaǵa kire beriste kólikterdi toqtatatyn turaq jelisi qurylady, sonymen qatar qalalyq qoǵamdyq kólikterdiń tarmaqtaryn keńeıtý jumystary jalǵasady.
Bıyl qalaǵa kire beris jerlerge 19 ekologıalyq post ornatý jumystary júrgizilýde. Búginde 9 ekopost ashyldy, qalǵan 10 beket aǵymdaǵy jyldyń kúzine deıin kezeń-kezeńimen ornatylady. Eki aılyq tekserýler qalalarǵa kiretin kólikterdiń 11%-y men 12,6%-y ekologıalyq normalarǵa sáıkes kelmeıtinin kórsetti. Kóktemde qalada júretin júk kólikteri ólshendi. Olardan shyǵatyn zalaldy zattardyń 29%-y normaǵa sáıkes kelmeıdi.
Ákimniń aıtýynsha, ómir súrýge jaıly qalany qalyptastyrý úshin Almatyda jel rejımin zertteý bastaldy. Zertteý nátıjeleri boıynsha jan-jaqty josparlaý jáne basqa da arhıtektýralyq-qala qurylysy sheshimderiniń jospary ázirlenedi.
Zertteýlerde jel rejımin, onyń táýlik nemese jyl maýsymyna baılanysty ózgerýine keshendi baǵa beriledi. Sonymen birge aýany lastaıtyn kózder zertteledi.
«Bul jumys matematıkalyq esepteýler jáne naqtyly derekter arqyly búkil qala boıynsha, ákimshilik aýdandar men nysandardyń aýa aǵyndaryna taldaý jasaıdy. Sondaı-aq, bul qala mańyndaǵy jeldiń ekpinine jáne onyń qalanyń aýa sapasyna áserin baǵalaıdy», — dep atap ótti Baqytjan Saǵyntaev.
Almatyda qala turǵyndaryn megapolıstiń ártúrli bólikterindegi aýa sapasy týraly habardar etetin joba iske asty. Aqparat qalanyń 49 LED-ekranyndaǵy 41 dachıkten, sondaı-aq «Almaty» telearnasynan alynady. Derekter kúnine úsh ret jańartylady.
Ákim Baqytjan Saǵyntaev bıylǵy jyl aýany baqylaıtyn qosymsha 60 dachıkti ornatý josparlanǵanyn habarlady. Barlyq derekter aqparatty jınaýǵa, taldaýǵa jáne óńdeýge arnalǵan GAJ júıesinde kórsetiledi. Osylaısha, qorshaǵan orta sapasynyń yqtımal boljamy úshin málimetter bazasy qurylady
Budan ózge, AirVision qoǵamdyq qorymen jáne bastamashyl azamattarmen birge aýanyń lastanýynyń onlaın-kartasyn qamtıtyn veb-portal jáne mobıldi qosymsha ázirlenýde. AQI ındeksi ǵalamdyq jelidegi aýanyń jaǵdaıyn salystyrý úshin ǵalamdyq ádisteme boıynsha esepteletin bolady.