Almaty — óńirdegi ınovasıalyq tehnologıalardyń ortalyǵy, munda eldegi barlyq stýdentterdiń 40%-y oqıdy.
Qalada úzdik JOO-nyń 30%-dan astamy, 2622 İT-kompanıa (QR 40%-y) ornalasqan,elektrondy saýda kólemi 551 mlrd teńgege jetýde. Elimizdiń árbir ekinshi ınovasıalyq tehnologıa mamany Almatyda turady jáne qalalyqtardyń 95%-y onlaın-servısterdi paıdalanady.
Almaty qalasynyń ákimi Baqytjan Saǵyntaev «Almaty» TA-daǵy kezekti tikeleı efır barysynda «Almaty-2050» Strategıasyn sıfrlandyrý baǵyttaryn damytý týraly aıtty, dep habarlady Almaty-akshamy.kz.
Qala ákiminiń aıtýynsha, megapolısti tıimdi basqarý sıfrlandyrý tetikterinsiz múmkin emes. Almatyda 2 mln jýyq adam turady, al Almaty aglomerasıasy shekarasynda – 3 mln. Qalada SHOB 287 myń kásiporny bar. Kólik ınfraqurylymyna 3 myń shaqyrymnan astam jol kiredi. Kún saıyn qalada 675 myńǵa jýyq kólik júredi. 165 myń jaryq baǵanalary ornatyldy.
Qalada densaýlyq saqtaýdyń kópdeńgeıli júıesi bar. Jyl saıyn qalanyń alǵashqy medısınalyq-sanıtarlyq kómek kórsetetin uıymdaryna 11,5 mln adam keledi.
Qala eldiń iri bilim ortalyǵy bolyp tabylady, munda bilim berý mekemeleriniń damyǵan jelisi bar. Qala mektepterinde 288 myń oqýshy oqıdy.
«Biz qazirdiń ózinde óńirdegi jetekshi qalalardyń birine aınaldyq, degenmen, qalanyń álemdik kartada negizi kóshbasshylyq pozısıany ustanýy úshin bizde barlyq jaǵdaı jasalǵan», — dep atap ótti Baqytjan Saǵyntaev.
Smart city nemese «Aqyldy qala» bastamasy aıasynda qalalyq resýrstar men qyzmetterdi basqarýdy jetildirý boıynsha jumys júrýde. Onyń ústine, qalanyń negizgi aktıvteri azamattar, prosester men tehnologıalar bolyp tabylady. Birinshi kezekte zıatkerlik modernızasıalaýdy qajet etetin salalar — memlekettik basqarý, qalanyń ınfraqurylymy, áleýmettik orta jáne ekonomıka.