«Ádiletti Qazaqstan: zań men tártip, ekonomıkalyq ósim, qoǵamdyq optımızm». Prezıdent Qasym-Jomart Toqaev Parlament palatalarynyń birlesken otyrysynda Qazaqstan halqyna Joldaýyn jarıalap jatyr, dep habarlaıdy aqshamnews.kz.
Bizde respýblıkalyq búdjettiń kiris bóligi oryndalmaı jatyr. Bul týraly Qazaqstan halqyna Joldaýyn jarıalaý kezinde Memleket basshysy Qasym-Jomart Toqaev aıtty.
«Aqsha-nesıe saıasaty men fıskaldy saıasattyń arasyndaǵy úılesimsizdikti joıý qajet. Qazir naqty sektorǵa nesıe áli de oıdaǵydaı berilmeı jatqanyn ashyq aıtýymyz kerek. Shaǵyn jáne orta bıznesti jetkilikti qarjylandyrý máselesi de sheshimin tapqan joq. Bul jaǵdaı elimizdegi iskerlik ortanyń belsendiligine, ekonomıkanyń turaqtylyǵyna jáne dáıekti damýyna kedergi keltirip otyr. Úkimet pen Ulttyq bank birlesip, osyǵan qatysty ońtaıly sheshimder oılastyrýy kerek. Bankterdiń ekonomıkaǵa kóbirek qarjy quıýyna jaǵdaı jasaý qajet», - dedi Qasym-Jomart Toqaev.
Memleket basshysynyń aıtýynsha, halyqaralyq sarapshylar qazaq bankterin resýrsqa baı elder ishindegi eń kóp paıda tabatyn bankter sanatyna qosady. Sondyqtan osy saladaǵy salyq mólsheri ádil belgilenýge tıis. Bankterdiń aksıonerleri dıvıdendine sáıkes salyq tóleýi kerek.
«Bankterge memleket kórsetken kómek turǵysynan qarasaq, bul – óte oryndy ustanym. Sıfrlyq aktıvterdiń aınalymyn qamtamasyz etý jáne bank salasyna ınovasıalardy qaýipsizdik talabyna sáıkes engizý úshin ony retteıtin tetikterdiń turaqty bolýy mańyzdy. Bizge Bankter týraly jańa zań qajet. Bul qujatta ekonomıkalyq belsendilikti qoldaý jáne fınteh salasyn qarqyndy damytý sıaqty ózekti máseleler sheshimin tabýy kerek. Qazir qoldanyp júrgen zań shamamen 30 jyl buryn qabyldanǵan. Ol kezde zaman da múlde basqa boldy. Ashyǵyn aıtýymyz kerek, bizde respýblıkalyq búdjettiń kiris bóligi oryndalmaı jatyr. Bul – burynǵy jáne qazirgi Úkimet jumysyndaǵy úlken olqylyq. Mundaı jaǵdaı jıi qaıtalansa, túptep kelgende, elimizdiń damýyn tejeıdi. Sondyqtan oǵan jol bermeý qajet. Búdjet qarjysyn tıimdi paıdalanyp, onyń shyǵys bóligin shektep, qatań baqylaýda ustaǵan jón. Úkimet Ulttyq bankpen birlesip, osy máselege qatysty naqty sharalar qabyldaýǵa tıis», - dedi Prezıdent.