Prezıdent Qasym-Jomart Toqaev Parlament palatalarynyń birlesken otyrysynda sóılegen sózinde Qazaqstan halqyna Joldaýyn jarıalady. Ol elimizdegi kóptegen azamattardyń birneshe nesıesi bar ekeni týraly aıtyp, bul máseleniń ózektiligin jáne qoǵamdyq qaterge aınalǵanyn atap ótti, dep habarlaıdy aqshamnews.kz
Memleket basshysy osy baǵytta arnaıy zańdar qabyldanǵanyn jáne halyqtyń ál-aýqatyn jaqsartýǵa baǵyttalǵan sharalardyń qolǵa alynǵanyn málimdedi.
Prezıdent ótken sesıada Parlamenttiń jemisti jumys atqarǵanyn, sonyń nátıjesinde 102 zań qabyldanǵanyn erekshe atap ótti. Bul zańdar qoǵamdyq baqylaý, adam saýdasyna qarsy kúres, ǵylym men tehnologıa saıasaty, jylý energetıkasy jáne basqa da mańyzdy máselelerdi retteıtin qujattar bolyp tabylady.
Áleýmettik salaǵa, ásirese balalardy qorǵaýǵa erekshe nazar aýdarylǵanyn aıtty. Ulttyq qordan balalardyń esepshotyna qarjy aýdarý týraly zań qabyldanyp, balalardy qumar oıyndarǵa tartqandarǵa ákimshilik jaza qarastyrylǵan. Sonymen qatar, kámeletke tolmaǵandarǵa zorlyq-zombylyq kórsetkeni úshin beriletin jaza kúsheıtildi, áıelder men balalarǵa qatysty qylmystardyń aldyn alý boıynsha zańdar qabyldandy.
Memleket basshysy Parlament múshelerine halyqpen tyǵyz baılanysta jumys istep, «Halyq únine qulaq asatyn memleket» qaǵıdasyn ornatýǵa yqpal etkeni úshin rızashylyǵyn bildirdi. Sonymen birge, alda áli de kóp jumys atqarý qajet ekenin atap ótti.