SDN tiziminen shyqqan Bereke Bank Swift júıesine qaıta qosyldy. Endi memlekettik Bereke Bank klıentteri B-Bank mobıldi qosymshasynda SWIFT halyqaralyq aýdarymdaryn AQSH dollarymen jáne eýromen qaıtadan jasaı alady. Demek, halyqaralyq aýdarymdarda esh shekteý joq. Osylaısha VTB-ny eseptemesek, Qazaqstannyń bank sektory tutas sanksıadan shyqty.
Dollarmen jáne eýromen onlaın aýdarymdaryn iske qosý Bereke bank-tiń operasıalyq qyzmetti qalpyna keltirý josparly jumysy sheńberinde oryndalǵan kezekti qadamy boldy. Endi sońǵy saty – Visa jáne Mastercard halyqaralyq tólem júıeleri boıynsha kartadan kartaǵa jasalatyn aqsha aýdarymdaryn qalpyna keltirý bolyp otyr. Bul Qazaqstannyń bank sektory úshin jaqsy jańalyq.
Qazaqstan Úkimeti sanksıaǵa ushyraǵan SberBank konglameratynyń bizdegi bankin satyp alyp, onyń atyn aýystyryp, AQSH-tyń sanksıa tiziminen shyǵaryp alǵan bolatyn. Týra osyndaı kúı keshken bizdegi Álfa-Bankty SentrKredıt satyp alyp, jutyp qoıdy. Tek VTB bank qana Qazaqstandaǵy bankin satpaı, sanksıa rejıminde jumys isteýge yńǵaılaı bastady.
Eldegi barlyq bank prýdensıaldy normalardy saqtap otyr. Al 2023 jylǵy 1 maýsymdaǵy jaǵdaı boıynsha bank sektory aktıvteriniń kólemi 45,4 trıllıon teńgege jetti. Bul bir aı burynǵy deńgeıden 1,2%-ǵa joǵary.
Mamyr aıyndaǵy aktıvterdiń ósimi boıynsha Shinhan Bank kósh bastap keledi. Sol aıda alty bank aktıvteriniń tómendeýin tirkegen. Eýrazıalyq bank (-4,1%) jáne KZI (-3,4%) quldyraý boıynsha kósh bastady.
Nesıe portfeli nemese bankterdiń klıentter qolyndaǵy qazirgi nesıe kólemi 25,5 trıllıon teńgeni qurap otyr. Tym tez ósip jatqan bankter ishinen Freedom Bank-ti atap aıtýǵa bolady.
Maýsym aıynyń qortyndysy boıynsha osy jaǵymdy trend saqtalýy tıis.
«Almaty-akshamý», №86, 20 shilde, 2023 jyl