Balýan Sholaq atyndaǵy sport jáne mádenıet saraıynda toǵyzqumalaq pen taekvondodan jarys ótip jatyr.
Amanat partıasy Almaty qalalyq fılıalynyń uıymdastyrýymen toǵyzqumalaq ulttyq oıynynan Balýan Sholaq atyndaǵy sport jáne mádenıet saraıynyń kishi zalynda Amanat Cup jekeleı ashyq birinshiligi ótip jatyr, dep habarlaıdy Almaty-akshamy.kz.
Oıyn qazaqtyń ulttyq oıyndaryn qala jastary arasynda dáriptep, rýhanı belsendilikterin arttyrý maqsatynda ótkizilýde. Sharaǵa Almaty toǵyzqumalaq federasıasy jáne «Almatykitap» baspasy qoldaý bildirdi.
«Amanat partıasy uıymdastyrǵan búgingi týrnırge Almatynyń ár aýdanynan úzdik balalar iriktelip alyndy. Jalpy, 40-qa jýyq oıynshy qatysyp jatyr. Týrnır uldar men qyzdar arasynda bólek bes aınalym boıynsha ótedi. Jarys shveısar júıesine negizdelgen, ıaǵnı upaıy joǵary myqtylar ózara kezdesedi, sóıtip, besinshi aınalymda jeńimpazdar anyqtalady. Toǵyzqumalaq shahmat sekildi rapıd, blıs jáne klasıkalyq bolyp bólinedi. Búgingi jarys rapıd boıynsha ótip jatyr, ıaǵnı ár oıynshyǵa 20 mınýt ýaqyt beriledi», – dedi jarystyń bas tóreshisi Álimjan Qydyrbaev.
Sonymen qatar, ol óz sózinde balalardyń toǵyzqumalaqqa qyzyǵýshylyǵy artyp kele jatqanyn da atap ótti:
«Qazir balalardyń toǵyzqumalaqqa qyzyǵýshylyǵy joǵary. Bul sporttyń bala sanasyna paıdasyn ata-analar da túsinip jatyr. Shahmatqa balalaryn qalaı berse, toǵyzqumalaq úıirmelerine de solaı qatystyrady. Qazirgi telefonǵa telmirgen zamanda toǵyzqumalaqtyń mı jumysyna paıdasyn ata-analar túsinip kele jatyr», – dedi ol.
Saıys jeńimpazdaryna aqshalaı syılyq tabys etiledi.
Aıta ketken jón, Balýan Sholaq atyndaǵy sport jáne mádenıet saraıynyń negizgi úlken zalynda Almaty taekvondo federasıasynyń uıymdastyrýmen halyqaralyq balalar men jasóspirimder arasyndaǵy Open Almaty týrnıri ótip jatyr.
«Qazir pandemıadan keıingi taekvondodan eń aýqymdy Open Almaty týrnıri ótýde. Jarysqa 6 jastan bastap, 17 jasqa deıingi 700-den astam balalar men jasóspirimder qatysyp jatyr. Jalpy, týrnırde Qazaqstannyń barlyq óńirleriniń jáne Qyrǵyzstan men Ózbekstannyń ókilderi bar. Sondaı-aq, týrnır aıasynda kásibı taekvondodan úsh jekpe-jek ótkiziledi. Atalmysh jarys salaýatty ómir saltyn dáripteý, buqaralyq sportty damytý jáne óskeleń urpaq arasynda patrıottyq sezimdi oıatý maqsatynda uıymdastyryldy», – dedi Almaty taekvondo federasıasynyń vıse-prezıdenti Bahtıar Baıazıtov.