Qutqarýshylarǵa balyqshylar habarlasyp, kómek suraǵan
Balqashta balyq aýlap júrip, kóldiń ortasynda qalyp qoıǵan balyqshylar qutqaryldy, dep habarlaıdy Almaty-akshamy.kz.
12 jeltoqsanǵa qaraǵan túni Balqash kólinde tórt balyqshy qutqaryldy.
Qutqarýshylarǵa balyqshylar habarlasyp, kómek suraǵan. Er adamdar jaǵalaýǵa óz kúshimen jete almaıtynyn aıtty, óıtkeni juqa muz ben shuńqyrlar jáne jaryqtar kedergi bolǵan.
Balyqshylar ózderiniń shamamen qaı tusta ekenin habarlady.
Qutqarý operasıasyn júrgizý úshin Qaraǵandy oblysy TJ departamentiniń qutqarýshylary oqıǵa ornyna shyqty, sondaı-aq «Qazaqmys korporasıasy»JSHS júzý quraly tartyldy.
Balyqshylarmen telefon baılanysy úzdiksiz júrgizilip turdy.
Tańerteń balyqshylar jaǵadan shamamen 25 km qashyqtyqtan tabyldy. Er adamdar jaǵaǵa jetkizilip, týystaryna tabystaldy. Medısınalyq kómekti qajet etpedi.
Qutqarýshylar muzǵa shyǵý kezinde qaýipsizdik sharalaryn saqtaý qajettigin eskertedi.
«Táýliktiń qarańǵy ýaqytynda muzǵa shyqpańyz. Aýa raıynyń jıi ózgerýine baılanysty oblystyń sý aıdyndarynda muz birde qalyń, birde juqa. Ózender men kólderde muz erip jatyr. Muz tez aǵatyn, sý basatyn jáne aǵyn sý júretin jerlerde, sondaı-aq sý ósimdikteri ósetin aýdandarda, aǵashtar men qamystyń janynda berik bolmaıdy. Tótenshe jaǵdaı qaýpi tóngen nemese týyndaǵan kezde 112 nemese 433636, 433737 telefondaryna qońyraý shalyńyzdar»,- dep eskertedi qutqarýshylar.