9 aılyq sabaqtan sharshaǵan balany jazǵy demalysqa shyǵa sala kelesi oqý jylyna daıyndaý úrdis bolyp ketti. Deni saý, shymyr bolsyn dep sportqa súıreımiz. Aqylyna aqyl, bilimine bilim qossyn dep túrli kýrsqa aparamyz. Zamannyń talaby dep til úıretýge tyrysamyz. Demalys ýaqytynda balasyn túrli dárigerge kórsetip, densaýlyǵyn bir tekserýden ótizip alǵan ata-ananyń endigi jumysy – mektepke kıetin kıimi men kerek-jaraǵyn túgendeý. Almaty-akshamy.kz saıtynyń búgingi saýalnamasy da osy tóńirekte órbidi.
Búgingi kúni balanyń mektepke barýy da ata-ananyń qaltasyna az salmaq emes. Ár adam úkilegen úmitiniń óz ortasynda jarqyrap júrgenin, sapasyz aıaqkıim kıip, densaýlyǵynyń qurymaǵanyn qalaıdy. Alaıda, sapaly dúnıeniń baǵasyna kez kelgenniń qoly jete bermeıdi. Bir kezde 2 teńgeden satylǵan dápterdiń baǵasy da qazir 15-20 ese qymbattap ketken. Almatynyń saýda oryndaryndaǵy baǵalardy salystyryp qarap shyqqanymyzda, mektepke kıetin aq jeıdeniń eń arzany 3500 teńge, shalbar men beldemsheniń eń tómengi baǵasy 5000 teńgeden ekenin baıqadyq, sapasy da baǵasyna laıyq ekenin túsinip otyrǵan shyǵarsyzdar. Eger sapaly jeıde men shalbar alǵyńyz kelse, qaltańyzdan 15-20 myń teńgeńizdi sanap berýge daıyn bolyńyz. Buǵan qosa, bul kıimderdi kem degende, aýystyryp kıetin taǵy bir danadan alatynyńyz bar. Bul jerge aýa raıy salqyndaǵanda kıetin keýdeshe, pıdjak, jempirdi qosqan joqpyz. Sómkeniń eń arzanynyń baǵasy 5500 teńgeden bastalady.
Memleketten kóp balaly otbasynyń balasyna beriletin kıimniń daýy áleýmettik jelini aralap ketkesin, aqshalaı beriletin bolǵan. Bıylǵy kómektiń kólemi – 40 567 teńge. Jelidegi aqparattarǵa qarasaq, bul kómekti alǵandardyń kóbi aqshany jetkize almaǵan syńaıly. Bazardyń narqy belgili, sondyqtan jetpeı qalsa, tańǵalmaımyz.
Biz áńgimege tartqan ata-analar baǵanyń turaqsyzdyǵyna, ony qadaǵalaıtyn organnyń joqtyǵyna renishti.
Gúlmıra Aımaǵambetova
Tórt balam mektepte oqıdy. Úlken ulym kadet klasynda oqıdy, onyń formasy 77 myńnan asady. Bul tek merekede kıetin kıimi (paradnaıa forma). Kúndelikti kıetin kıimin byltyr alǵanbyz, ol tar bolyp qalypty, endi sony alamyz. Onyń baǵasy 22 myńdaı oǵan qosa aıaqkıimin (bersy) alý kerek. Ata-analar birigip arnaýly dúkennen alamyz, sony kútip otyrmyz. Ekinshi ulym jekemenshik mektepte oqıdy. Oǵan asa kóp ketpedi. Aq jeıde (12 myń tg) men shalbar (10 myń tg) jáne týflı (22.000) aldym. Odan keıingi bastaýyshta oqıtyn ul men qyzdyń árqaısyna únemdep alǵannyń ózinde 35 myńdaı aqsha ketti. Keńse taýarlary men sómkelerin de endi alamyz.
Álıa Ospanqyzy
Bıyl baǵalar aıryqsha sharyqtap tur, tek Glasmanda ǵana formanyń baǵasy turaqty, al bazardaǵy kanselárıa zattarynyń qunyn qadaǵalap jatqan eshkim joq, 3 oqýshy balam bar, úsheýine orta eseppen 400 myńdaı aqsha jumsadym, árıne ata-ana balasynan neni aıasyn, eń jaqsyny alǵyń keledi, desek te shamamyzdyń kelgeninshe aldyq.
Ǵaını Ysqaqova
Qazirgi zattyń sapasy joq, byltyrǵy kıimdi bıyl kıgize almaısyz. Qazaq otbasynda jaz mezgili jóndeý jumystaryna jáne aǵaıyn-týystyń toıyn aralaýǵa arnalady ǵoı kóbine. Sol sebepti balalaryma áli mektep formasyn da, dápter-qalamyn da satyp alǵan joqpyz. Jalaqymyzdy ár aıdyń basynda alatyndyqtan, qyrkúıektiń bolýyn kútip júrmiz. Negizi jazdyń kúzge aýysar shaǵy kóp otbasy úshin qarjylyq jaǵynan ońaı emes. Balany mektepke daıyndaý da, úı-jaıyńdy, otyn-sýyńdy qamdaý da osy kezde qabattasyp qalady. Osyndaı kezde jumys berýshiniń tarapynan bir kómek bolsa eken, tym quryǵanda jalaqymyzdy ýaqytynan erterek berse ǵoı dep oılaımyn. Baǵanyń aspandap turǵany belgili, ózimniń alatyn 300 myń teńgemdi 3 balama qalaı jetkizerimdi oılap basym qatyp júr.