Endi balanyń týýyn tirkeý qyzmetin eGov.kz portalyna kirmeı-aq, neǵurlym yńǵaıly proaktıvti formatta alýǵa bolady.
eGov.kz portalynyń málimetinshe, bul qyzmette SMS habarlamalar men habarlandyrýlar qolaıly proseske ońtaılandyrylǵan. Sebebi, memleket azamatqa belgili bir turmystyq jaǵdaıǵa qajetti qyzmetti alýdy ózi usynady. Ol úshin eshqaıda barýdyń qajeti joq, tek SMS-ke jaýap retinde qajetti aqparatty jiberse jetkilikti, dep habarlaıdy Almaty-akshamy.kz QazAqparatqa silteme jasap.
«Bala týǵannan keıin bir táýlik ishinde aqparattyq júıe medısınalyq mekemeden habarlama alyp, balanyń ata-anasyna qyzmet kórsetý úshin qajetti aqparatty alý maqsatynda kezeń-kezeńimen 1414 nómirinen SMS jiberedi. Buryn azamattar SMS habarlamalardy basqa formatta alatyn. Endi proses áldeqaıda jeńildedi, áldebir áripterdi kórsetý talap etilmeıdi, tek qoıylǵan suraqtarǵa jaýap berý kerek», - dep jazylǵan aqparatta.
Qyzmetti paıdalaný úshin mobıldi azamattar bazasynda tirkeýde bolý qajet, tirkeýsiz SMS habarlama kelmeıdi. Qyzmet tegin kórsetiledi, tek telefon nómirinde teńgerim bolý kerek.
«Qyzmet kórsetý úshin qajetti málimetter ártúrli memlekettik organdardyń aqparattyq júıelerinen alynady, al jetispeıtin málimetter balanyń ata-anasynan SMS-arqyly suralady. Qyzmet kórsetý nátıjesinde azamattar balanyń týý týraly kýáliginiń (qaǵaz túrinde) daıyn ekendigi týraly SMS habarlama nemese bas tartý sebebi kórsetilgen dáleldi jaýap alady», - delingen resmı jazbada.