Vıse-premer ata-analar úshin erekshe laıfhakpen bólisti.
Ermek Kósherbaevtyń sózinshe, atalǵan jelide balanyń qaýipsizdigin baqylaýǵa múmkindik bar.
– TikTok parametrlerindegi kámeletke tolmaǵandardyń qaýipsizdigi úshin ata-analar "Ata-ana baqylaýy" baǵdarlamasyna qosylyp, "Otbasylyq baptaý" arqyly ata-ana jasóspirimniń eseptik jazbasyn óz eseptik jazbasymen baılanystyra alady, – delingen resmı jaýapta.
Atalǵan tetik arqyly ata-ana balasynyń qolyndaǵy smartfonnyń ekran ýaqytyn shektep, qupıalylyq ornatýǵa bolady ári jeke habarlamalardy qaýipsiz etý de ońaı.
– TikTok onlaın platformasynyń ishki erejesine sáıkes, ony 13 jastan asqan adamdar ǵana qoldana alady jáne platformadaǵy keıbir múmkindikterge kámelet jasyna tolmaǵan jastar úshin qol jetkize almaıdy. TikTok platformasyn paıdalanýshylar ekran ýaqytyn 40, 60 mınýt, bir jarym saǵat nemese kez kelgen basqa qalaǵan ýaqytqa ornatý arqyly jasóspirimderdiń onlaın platformany paıdalaný ýaqytyn shekteı alady. Al ata-analar ornatqan ýaqyt shegi aıaqtalǵannan keıin jasóspirimderden áleýmettik jelini paıdalanýdy jalǵastyrý úshin qupıa sózdi engizý suralady. Ol qupıa sózdi engizgen jaǵdaıda ǵana qosymsha 30 mınýtqa qosa alady. Ata-analar belgilengen keste boıynsha TikTok habarlandyrýlaryn óshire alady. Atap aıtqanda, 13 pen 15 jas aralyǵyndaǵy paıdalanýshylar 21:00-den bastap, al 16-17 jas aralyǵyndaǵy jasóspirimder 22:00-den bastap habarlama almaıdy, – dep jazady Premer-mınıstrdiń orynbasary.
Depsaýalǵa berilgen jaýapta osy kúni Oqý-aǵartý mınıstrliginiń balalarǵa arnalǵan SIM-karta engizý máselesi qaralyp jatqany sóz bolǵan.
– Arnaıy SIM kartanyń kómegimen ata-analar balalaryn baqylap, olardyń onlaın ýaqytyn shekteı alatyn bolady. Muqıat taldaý júrgizip, halyqaralyq tájirıbeni zerdelegennen keıin bul bastama zańnamalyq deńgeıde bekitiledi, – dep qosa ketti Ermek Kósherbaev.