Bıyl halyqtyń áleýmettik osal toptarynan 400 myńnan astam bala mektep formasymen, mektepke qajet kerek-jaraqtarymen qamtamasyz etýge materıaldyq kómekpen qamtylatyn bolady.
400 myńnan asa bala mektepke daıyndalý úshin materıaldyq kómek alady, - dep habarlaıdy Almaty-akshamy.kz tilshisi Oqý-aǵartý mınıstrliginiń baspasóz qyzmetine silteme jasap.
Ár bilim alýshyǵa kıim, oqý quraldaryn satyp alýǵa arnalǵan qarajattyń eń tómengi mólsheri - 40 567 teńge. Barlyq aqsha aýdarymdary ata-analardyń kartochkalyq shottary arqyly júzege asyrylady.
Qarajat ata-analarǵa balalarmen birge mektep formasyn, aıaq kıimdi, keńse taýarlaryn ózderi tańdap alý úshin beriledi.
Muqtaj otbasylarǵa materıaldyq kómek kórsetý jáne balalardy 100 paıyz qamtamasyz etý úshin jalpyǵa birdeı mindetti orta bilim berý qory jumys isteıdi. Qordyń ataýy - "Jalpyǵa birdeı oqytý". Qor arqyly ataýly áleýmettik kómek alatyn otbasylardan shyqqan balalarǵa, sondaı-aq jan basyna shaqqandaǵy ortasha tabysy eń tómengi kúnkóris deńgeıinen tómen otbasylardan shyqqan balalarǵa materıaldyq kómek kórsetedi.
Jańa oqý jyly qarsańynda jetim jáne ata-anasynyń qamqorlyǵynsyz qalǵan balalar, tótenshe jaǵdaıǵa tap bolǵan oqýshylar qarjylaı kómek alady. Onyń ishinde Abaı oblysyndaǵy apattan qaza tapqan ormanshylardyń balalary bar.
Aıta keteıik, byltyr mektep jıyntyǵyn satyp alý somasy 17 myń teńgeden bastalǵan bolatyn.